भांगरभूंय | प्रतिनिधी
मडगांव, प्रतिनिधी : लोकसभा वेंचणूक लागीं पावल्या. एक एक गट मुखार सरून हाका- ताका तिकेट दिवची अशें सांगता. कॉंग्रेशींत नवे आयिल्ले आनी दोन चार दीस काम केल्ल्यांनी कोणाक तिकेट दिवची हें सांगचें न्हय. कॉंग्रेसीक जांणी मतां दिलीं ते मतदार उमेदवार कोण ते सांगतले आनी ताचेर निमाणो निर्णय कॉंग्रेस घेतली. कांय जाणां कॉंग्रेसीचे उदरगती खातीर कार्यरत आशिल्ल्याचें सांगतात. पूण प्रत्यक्षांत ते भाजपाच्या पे- रोलार आसात. तांकां कॉंग्रेस सोंपोवपाची आसा, अशी टिका खासदार फ्रान्सीस सार्दीन हांणी केली.
सार्दीन हांणी दक्षीण गोंय जिल्हो कॉंग्रेस कार्यालयांत पत्रकार परिशद घेवन सांगलें, काल परवां पक्षांत आयिल्ल्यांक तिकीटा विशीं निर्णय घेवपाक मेळचो ना. कॉंग्रेसीचे निश्ठावंत आनी मतदार उमेदवार कोण तें सांगतले. उपरांत पक्ष निमाणो निर्णय घेतलो. पक्षांत रावून पक्ष सोंपोवपा खातीर कोण काम करता तांचीं नांवां घेवचो ना, अशेंय तांणी सांगलें.
राज्यांतल्या पर्यटन हंगामा वेळार तरी रस्ते सारके करपाची मागणी सार्दीन हांणी केली. लोकांनी सांबाळिल्लीं शेतां आनी घरां वेटलँडच्या नांवाखाला सोंपोवचीं न्हय. तळें फकत पावसांत भरता. बाकी वेळार शेती आनी हेर कामां सुरु आसतात. आतां मेरेन हो जागो थळाव्यांनीच सांबाळ्ळा. ताका लागून कोणाकूच कसलोच त्रास करिनासतना ह्यो गजाली जावपाक जाय अशी मागणी सार्दिन हांणी शेतकी मंत्री आनी संचालकांकडेन केली.
संजीवनी साखर कारखान्या मुखार शेतकरी आंदोलन करतात. महाराष्ट्रांतल्या शेतकार्यांनीय तांकां फांटबळ दिलां तरीय सरकार दोळे धांपून आसा. सरकार फायदो काडपा खातीर न्हय तर लोकांचें बरें पळोवपा खातीर आसता. इथेनॉल प्रकल्प कोणाक जाय हें स्पश्ट करचें. साखर कारखानो रोखडोच सुरु करचो, शेतकार्यांक कर्नाटक, महाराष्ट्रांत भिकेक वचपाक दिवं नाका, अशेंय तांणी म्हणलें.
एसटी समाजाक आजूनय राजकी आरक्षण मेळूंक ना. एसटी समाजाचो आंकडो जरी उणो आसा तरी एसटी समाजाक राजकी आरक्षण मेळपाक जाय. धनगर समाजाकूय एसटीचो दर्जो दिवचो. पोरणें गोंय दायज थळार कसलेच तरेच्या बांदकामांक परवानगी दिवची न्हय. सरकारान पंचायतीक पत्र धाडून कोणाक परवानो दिल्यार ती परवानगी फाटीं घेवपाक सांगचें,अशें सार्दीन हांणी म्हणलें.
गोंय पुर्तुगेजांच्या चपक्यांत आशिल्ले. पुर्तुगेज काळांत १९६१ पयलीं जल्म जाल्ल्या व्यक्तींक पासपोर्ट दिवपाची वेवस्था पुर्तुगालान केल्या. सध्या ओसीआयचो मुद्दो आशिल्ल्यान पुर्तुगालांत जल्म नोंद आशिल्ल्यांक भारतीय पासपोर्ट दिना. हें केंद्रीय गृहमंत्र्यां वांगडा परराष्ट्र मंत्र्यांकूय पत्र बरयलां अशें स्पश्ट केलां.
फूट घालप्यांच्या मनांत देव रामान प्रेम निर्माण करचें : सार्दिन
अयोध्येंत आतां राममंदिर जालां. ताचें उक्तावण करतले. ह्या निमतान राम देवा कडेन इतलेंच मागपाक सोदतां, जो पक्ष धर्माच्या, जातीच्या नांवान लोकां मदीं फूट घालता ताच्या मनांत मोग निर्माण करचो. भारताचे उदरगती कडेन लक्ष दिवचें. बेरोजगारीचो प्रस्न, म्हारगायेचो प्रस्न सोडोवपाची बुद्द दिवची. दुसर्या धर्माचो द्वेश करचो न्हय. सरकारान सगळ्यांक समजून घेवन देशाची उदरगत करची. खंयचोच धर्म लोकांचें वायट करपाक शिकयना, अशें खासदार सार्दिन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
