भांगरभूंय | प्रतिनिधी
म्हापशें, प्रतिनिधी ः मेवणेच्या 16 वर्साचे नेण्टे चलयेचेर लिंगीक अत्याचार केल्ल्याच्या आरोपांत 48 वर्सां पिरायेच्या दुबावीत मावश्याक म्हापशें पुलिसांनीअटक केल्या. पिडित चलयेन शाळेच्या समुपदेशन सत्रांत हो प्रकार उक्तो केलो.
पुलिसांनी दिल्ले म्हायती प्रमाण, पिडित चलयेचे आवयन पुलिशेंत कागाळ केल्या. हो प्रकार फाटल्या मार्च 2023 वर्सा घडिल्लो. दुबावित मावसो पिडित चलयेच्या घरा गेल्लो. थंय ताणें भाची घरांत एकलीच आसा ते पळोवन तिचेर लैंगीक अत्याचार केलो. बुधवार 3 जानेवारीक शाळेंत आयिल्ल्या बायल समुपदेशका कडेन पिडितीन चलयेन ही घडणूक उक्ती केली आनी स्वताक शाळेच्या बोर्डिंगांत (हॉस्टेलांत) दवरपाची विनवणी केली. उपरांत ही म्हायती शाळेन पिडितेचे आवयक दिली. ते प्रमाण तिणें पुलिशेंत कागाळ केली.
हे कागाळीचेर आदारून पुलिसांनी भा. दं. सं. च्या कलम 376 आनी गोंय बाल कायद्याच्या कलम 8 (2) आनी पोक्सो कायद्याच्या कलम 4, 6, 8, 12 खाला गुन्यांव नोंद करून दुबावीताक अटक केली.
पुलीस निरीक्षक सीताकांत नायक हांच्या फुडारपणा खालच्या पंगडान म्हायती एकठांय करून दुबाविताक अटक केली. पुलीस अधीक्षक निधीन वाल्सन आनी उपअधीक्षक जीवबा दळवी हांच्या मार्गदर्शना खाला फुडली चवकशी चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
