भांगरभूंय | प्रतिनिधी
4 मोबायल फोन आनी लॅपटॉप सयत पांच लाखांचो म्हाल चोरलो
म्हापशें, प्रतिनिधी ः शिवोले गांवसवाडो – सडयेंतल्या जगलस इमारतींतल्या दोन व्हिलांतल्यान पर्यटकांचे 4 मोबायल फोन आनी लॅपटॉप, रोख रक्कम आनी हेर मोलादीक वस्तू मेळून पांच लाखांचो म्हाल चोरलो. ह्या प्रकरणांत पुलिसांनी अनवळखी चोरा आड गुन्यांव नोंद केला.
ही घडणूक मंगळारा 2 तारखेक सांजवेळा 7.45 ते 8.15 वरां मजगतीं घडली. हे विशीं व्हिलाचो धनी नरेंद्र सिंगान पुलिशेंत कागाळ केल्ली. दिल्लीचे पर्यटक समृध्दी शर्मा, प्रभजोत सिंग आनी हेर तांचे वांगडी फिर्यादी सिंग हांच्या जगलस इमारतींतल्या व्हिला क्रमांक 2 हांगा रावताले. जाल्यार मुंबयचे आशिश मोहन आनी ताचे वांगडी व्हिला क्रमांक 6 रावताले.
घडणुकेच्या वेळार दोनूय व्हिलांतले पर्यटक दार उक्तें दवरुन न्हिदिल्ले. ही संद घेवन चोरांनी चोरी केली. दोनूय व्हिलांतल्यान चार मोबायल फोन, एक लॅपटॉप, एक टॅबलेट, जॅकेट, किरकोळ रक्कम आनी हेर मोलादीक वस्तू चोरल्यो.
ही घडणूक उजवाडाक आयले उपरांत वयल्या पर्यटकांनी व्हिलाच्या धनीक म्हायती दिली. उपरांत पुलिशेंत कागाळ दाखल केली. पुलिसांनी चोरीचो गुन्यांव नोंद केला. फुडली चवकशी पुलीस उपनिरिक्षक बाबलो परब करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
