भांगरभूंय | प्रतिनिधी
मडगांव, प्रतिनिधी : कॉंग्रेस विधिमंडळ पक्षाची बसका ह्या सप्तकांत जातली. उपरांत येवपी अधिवेशनाचे रणनीतीचेर चर्चा करपा खातीर विरोधी पक्षाच्या आमदारांची बसका जातली. विरोधी आमदार एकठांय येवन प्रस्न, शुन्य वराचो उल्लेख, लक्षवेधी सुचवण्यो आनी खाजगी वांगड्यांचें काम हाचेर चर्चा करून निर्णय घेतले. सगळे विरोधी आमदार एकवटान आनी प्रभावीपणान सरकाराक वेटाळो घालपाक येसस्वी जातले असो विस्वास विरोधी पक्ष फुडारी युरी आलेमांव हांणी उक्तायलो. विरोधी पक्ष फुडारी युरी आलेमांव हांणी प्रसिद्धी पत्रक काडून अधिवेशना विशीं भुमिका मांडली. सगळ्या विरोधकांक एकठांय घेवन अधिवेशनांत लोकांचे मांडटले अशें सांगलें.
आठव्या गोंय विधानसभेच्या सव्या अधिवेशनाच्या स कामकाजाच्या दिसांची घोशणा करपी गोंय विधानसभेच्या सचिवांनी जारी केल्ल्या बुलेटिनान मुख्यमंत्र्यांच्यो घोशणा अर्थ नाशिल्ल्यो आनी त्यो गंभीरपणान घेनात हें सिद्ध जालां. मुख्यमंत्र्यां खातीर बीएसी म्हळ्यार बिजनेस एडवायजरी समिती नाशिल्ल्यान भाजप सल्लागार समिती आशिल्ल्याचो आरोप विरोधी पक्ष फुडारी युरी आलेमांव हांणी केला.
२१ डिसेंबर २०२३ दिसा जाल्ले मंत्रिमंडळाचे बसके उपरांत घेतिल्ले पत्रकार परिशदेंत फेब्रुवारीच्या विधानसभेच्या अधिवेशनाचें वेळापत्रक बीएसी म्हळ्यार कामकाज सल्लागार समिती थारयतली, अशी घोशणा मुख्यमंत्र्यांनी केल्ली. हो व्हिडीओ जारी करून, विरोधी पक्ष फुडार्यांनी मुख्यमंत्र्यांक योग्य विचार करिनासतना निराधार विधान केल्ले खातीर झोडले.
२०२४चे पयले स म्हयने गोंय विधानसभेचें फकत स दिसूच कामकाज चलतलें हें आतां स्पश्ट जालां. फुडलें अधिवेशन जुलय-ऑगस्ट २०२४त अपेक्षीत आशिल्ल्यान भाजप सरकार विरोधकांक भियेता अशें दिसता, असो दावो युरी आलेमाव हांणी केला. मुख्यमंत्री डॉ. प्रमोद सावंत हांच्या नेतृत्वा खाला भाजप सरकार स्वताचीं आस्वासनां आनी दिल्ल्यो घोशणां पुराय करपाक पुरायेन अपेशी थारलां हें स्पश्ट जालां अशें तांणी सांगलें.
मजगतीं, कामकाज सल्लागार समितीचे बसकेंत विरोधी पक्षाच्या आमदारांक आनीक वेळ दिवप, लक्षवेधी सुचवण्यांचो आंकडो वाडोवप आनी विरोधकांक चडांत चड अंद दिवपाच्या विशयांचेर सभापतीकडेन मागणी करतले. तशेंच विधानसभेच्या प्रस्नांक अपुराय, चुकीच्यो आनी भुलोवपी जापो दिवपी अधिकार्यांचेर खर कारवाय करपाची मागणी करतलों अशें आलेमांव हांणी सांगलें.
नियोजन, सांख्यिकी आनी मुल्यमापन विभागा कडल्यान मेळिल्ले म्हायती प्रमाण २०२२-२३ च्या अर्थसंकल्पीय घोशणां मदीं फकत ३४ टक्के घोशणा सरकाराक लागू करपाक जाल्यो. अंदूं सरकारान २०२३-२४ च्या अर्थसंकल्पीय घोशणां मदल्या फकत १०.५१ टक्के प्रस्तावांचेर प्रक्रिया सुरू केल्ल्याचें आलेमांव हांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
