भांगरभूंय | प्रतिनिधी
वाळपय-ठाणें रस्त्या वेल्या घातक व्हॉल्तार काळान घाली झोपय
वाळपय: 2024 वर्साच्या पयल्याच दिसा फोंडें पुलीस स्टेशनार कॉन्स्टेबल म्हूण काम करपी सत्तरी डोंगुर्ली ठाणेंचो उल्हास गांवकार (32) हाका अपघातांत मरण आयलें. वाळपय-ठाणें मजगतच्या कोपाड्डें आनी वेळूस हे शिमेर एका घातक व्हॉल्तार हो अपघात घडलो. हाका लागून सत्तरी म्हालांत दुख्खाची सया पातळ्ळ्या.
काल (सोमारा) सकाळीं डोंगुर्ली सत्तरीचो उल्हास गांवकार हो ठाणें सावन वाळपय वळपय वटेन आपली जीए 04 जे 9241 क्रमांकाची दुचाकी घेवन वतालो. वेळूस कोपाड्ड्यां एका घातक व्हॉल्तार ताचेर काळान झोपय घाली. मुखा वेल्यान येवपी जीए 07 एल 2009 मोटारीची आनी ताची एकामेका सामकार टक्कर जाली. हातूंत तो गंभीर अवस्थेंत जखमी जालो. मुळाव्या उपचारा खातीर वाळपय सरकारी समाजीक हॉस्पिटलांत ताका व्हेले उपरांत फुडल्या उपचारा खातीर गोमॅकाँत धाडून दिलो. सुमार तीन वरां मरणा कडेन झूज दीत निमाणें ताका मरण आयलें.
वाळपय-ठाणें मजगतच्या कोपाड्डें आनी वेळूस शिमेर एक घातक व्हॉल्त आसा. हाचे पयलीं हांगा खूबशे अपघात घडल्यात. काल उल्हास गांवकाराक ह्याच व्हॉल्तार मरण आयलें. सकाळीं आठ वरांच्या सुमाराक हो अपघात जालो.
हे विशीं वाळपय पुलिसां कडल्यान मेळिल्ले म्हायती प्रमाण उल्हास गांवकार आपली दुचाकी घेवन वाळपय वटेन वतालो. जाल्यार गजा सुहास नायक (रा. ठाणें) हो आपली मोटार घेवन ठाण्याचे दिशेन वतालो. गजा नायक हाचें मोटारी वेलें नियंत्रण सुटलें आनी ताणें चुकीचे उजवे वटेन अचकीत मोटार घेतिल्ल्यान मुखा वेल्यान येवपी उल्हास गांवकार होचे दुचाकीक धपको बसलो. हो धपको इतलो खर आशिल्लो की मोटारीचो दर्शनी भागाचें व्हड प्रमाणांत लुकसाण जालें. ह्या अपघातांत उल्हास गांवकार हाच्या पांयाक खर दुखापत जाली. तेच प्रमाण तकली रस्त्यार आपटल्ल्यान तो गंभीर अवस्थेंत जखमी जालो.
रोखडोच ताका वाळपयच्या सरकारी हॉस्पिटलांत उपचारा खातीर दाखल केलो. थंय उपचार केले उपरांत फुडल्या उपचारा खातीर गोमॅकाँत दाखल केलो. ताणें तीन वरां मरणा कडेन झूज दिली. दोतोरांनी ताका वाटावपाचो यत्न केलो. पूण तकलेक खर दुखापत जाल्ल्यान रक्तस्राव जालो. हाका लागून ताची भलायकी सेगीत खालावत गेली. दनपारां एक वरांच्या सुमाराक ताका दुर्दैवी मरण आयिल्ल्याची घोशणा वैजकी अधिकार्यांनी केली.
एका प्रत्यक्ष पळोवप्यान म्हायती दितना सांगलें की, धपको इतलो खर आशिल्लो की मोटार चालकाचो मोटारी वेलो ताबो सुटून ताणें पयलीं उल्हास गांवकार हाका धपको दिलो आनी उपरांत मुखार आशिल्ल्या विजेच्या खांब्याक धपको दिवन मोटार 30 फूट सकयल वचून कानालांत पडली. मोटारीचें व्हड प्रमाणांत लुकसाण जालां.
उल्हास गांवकार फोंडें पुलीस स्टेशनार काम करतालो. अपघाताची खबर कळटकूच पुलीस स्टेशनार दुख्खाची सया पातळ्ळी. ताच्या पुलीस इश्टांनी गोंय वैजकी म्हाविद्यालयांत वचून ताचे कुडीचें दर्शन घेतलें.
उल्हास गांवकाराचे पांच वर्सां पयलीं लग्न जाल्लें. ताका तीन वर्साचो पूत आसा. उल्हास गांवकार हाच्या मरणान कुटुंबाचेर संकश्ट कोसळ्ळां.
मजगतीं, गोमॅकाँत मरणा उपरांतचे तपासणे उपरांत उल्हास गांवकाराची कूड तांच्या सोयऱ्यां कडेन दिली. सोमारा रातीं डोंगुर्ली मसंडभुंयेंत ताचेर निमाणे संस्कार केले. ह्या वेळार पुलीस खात्यांतले कर्मचारी, सोयरे, इश्ट आनी लोकांनी व्हड प्रमाणांत हाजेरी लायिल्ली.
मोटार चालकाचेर गुन्यांव दाखल
वाळपयचे पुलीस निरिक्षक राहूल नायक हांणी दिल्ले म्हायती प्रमाण मोटार चालक गजा सुहास नायक हाचेर निश्काळजीपणान वाहन चलयिल्ले खातीर गुन्यांव दाखल केला. सद्या तरी ताका अटक केल्या. हे विशींचो तपास सुरू आसून फुडली कारवाय करतले अशें नायक हांणी स्पश्ट केलें. घडणुकेचो पंचनामो पुलीस उपनिरिक्षक नानू ठाकूर हांणी केलो. निरिक्षक राहूल नायक हांच्या मार्गदर्शना खाला पुलीस उपनिरिक्षक नानू ठाकूर फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
