भांगरभूंय | प्रतिनिधी
हरमल, बातमीदार: हरमलच्या सकयलोवाडो वाठारांत पर्यटन हंगाम सुरू आशिल्ल्यान वेवसायीक जिवाक धोको निर्माण करपी कामां करपाक लागल्यात. रस्त्या कुशीकच्या विजेच्या ट्रान्सफॉर्मरांचेर जायराती लावन वेवसायीक आपल्या जिवा कडेन खेळटात. तशेंच रस्तो, घरांचेर, कंपावंडांचेर जायराती लावन सगळो वाठार इबाडिल्ल्यान पंचायतीन हाचेर कारवाय करपाची मागणी लोक करतात.
हरमलच्या वाठारांत लायटीचे खांबे, खाजगी घरां आनी कंपांवंडांचेर भौशीक सुवातांचेर जायराती लावन हो वाठार हळशीक केला. वीज खात्याच्या अधिकार्यांनी अश्यो जायराती लावपा खातीर शुल्क घेवपाक सुरवात केल्या, अशें मत एक नागरीक रामकृष्ण माज्जी हांणी उक्तायलां.
हरशीं राजकीय व्यक्तीच्यो जायराती दिसल्यार त्यो काडून उडोवपाचे आदेश दितात. पूण ह्या वेवसायिकांक अश्यो जायराती दसोवपाचो अधिकार कोणें दिलो? अश्यो जायराती अपघातांक कारण थारूं येतात. कसलोय अपघात घडल्यार हाका खातें जापसालदार आसतलें, असो प्रस्न आदले पंच वांगडी प्रविण वायगंणकार हांणी उक्तायलो.
वीज खात्याच्या अधिकार्यांनी हे विशीं खर भुमिका घेवन ह्यो जीव घेवपी जायराती काडून उडोवपाची मागणी हांगचे लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
