भांगरभूंय | प्रतिनिधी
शिक्षकांक 6 म्हयने ते एक वर्सा मेरेन मेळटलें प्रशिक्षण
पणजी ः राज्य सरकाराची आयआयटी, बिट्स पिलानी कडेन ‘फॅकल्टी इनरिचमेंट इंटर्नशीप प्रोगाम’ ची समजिकाय कबलात जाली. राज्यांतल्या उच्च शिक्षण मळा वयल्या शिक्षकांक 6 म्हयने ते एक वर्सा मेरेन आयआयटी आनी बिट्स पिलानी संस्थेकडल्यान प्रशिक्षण मेळटलें. ह्या वेळार मुख्यमंत्री डॉ. प्रमोद सावंत, सचिव प्रसाद लोलयेकार आनी हेर अधिकारी हाजीर आशिल्लें.
ह्या कबलाती प्रमाण राज्यांतल्या सरकारी आनी खाजगी शाळांतल्या शिक्षकांक ‘फॅकल्टी एनरिचमेंट इंटर्नशिप प्रोग्राम’ खाला स म्हयने ते 1 वर्सा मेरेन प्रशिक्षण दितले अशें मुख्यमंत्र्यांन सांगलें. हातूंत आयआयटी गोंय सयत भौतिकी शास्त्र, गणित आनी संगणक विज्ञान जाल्यार बिट्स पिलानी सयत संगणक विज्ञानांत प्रशिक्षण दिवपा खातीर कबलात केल्या.
अशा व्हड शिक्षणीक संस्थांच्या प्रशिक्षणाक लागून राज्यांतल्या शिक्षकांक आनी विद्यार्थ्यांक फायदो जातलो. केंद्रीय शिक्षण खात्यान देशांतल्या हेर राज्यांकय त्या राज्यांतल्या मुखेल शिक्षणीक संस्थां कडेन अशे कबलाती करपाची सुचोवणी दिल्या. फुडाराकूय राज्य सरकार जीआयएम आनी एनआयआयटी कडेन अशे तरेचे कबलाती करतले अशें मुख्यमंत्र्यांन स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
