भांगरभूंय | प्रतिनिधी
वास्को, प्रतिनिधी: राष्ट्रीय म्हामार्ग प्राधिकरण एके वटेन म्हामार्गाच्या डिव्हायडराचें सोबितीकरण करतना शांतीनगर ते गांधीनगर मजगतींच्या रस्त्या कुशीक व्हडा प्रमाणांत कोयर दिसता. महामार्ग प्राधिकरणान ह्या कोयराचो विलो लावपा खातीर उपाय काडपाची गरज लोक उक्तायतना दिसता.
वेर्णा चौक ते दाबोळी विमानतळ मजगतींचो कोयर उखलतात, मात शांतीनगर ते गांधीनगर मजगतींच्या रस्त्या कुशीकचो आनी गटारांनी जाल्ल्या कोयरा कडेन आडनदर जाता. अशें प्राधिकरणा वतीन कित्याक जाता असो प्रस्न पडला.
राष्ट्रीय महामार्ग प्राधिकरणान सध्या रस्तो डिवायडरांक धवो, काळो, हळदुवो रंग लावपाचें काम हातांत घेतलां. तशेंच वरुणपुरी ते गांधीनगर, बोगदो, सड्यार मजगतींच्या रस्त्याचेर झाडांचे रोंपे लावपाचें काम सुरू आसा. पूण शांतीनगर ते गांधीनगर मजगतींच्या रस्त्या कुशीक आनी गटारांनी व्हडा प्रमाणांत कोयराच्यो राशी दिसून येतात.
मुरगांव पालिकेन आपलीं कांय कोयर संकलन केंद्रां उबारल्यां. ताका लागून लोक कोयर हांगा हाडून उडयतात. देखून सगळ्याक कोयर पातळटा. कोयर एकठांय करप्या कडेन कोयर दिवपाचें सांडून लोक तो रस्त्या कुशीक, गटारांनी उडयतात. हे विशीं मुरगांव पालिका आनी राष्ट्रीय महामार्ग प्राधिकरणान कारवाय करपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
