भांगरभूंय | प्रतिनिधी
डॉ. प्रमोद सावंत: गोंयकारांची भलायकी बरी उरपा खातीर विशेश मोहीम
दिवचल: 2024 ह्या नव्या वर्सां प्रधानमंत्री नरेंद्र मोदी हांचे संकल्पनेंतलें फीट इंडिया खाला पुराय गोंयांत सगल्यांची भलायकी बरी उरची हे खातीर विशेश मोहीम तशेंच स्वयंपूर्ण आत्मनिर्भर गोंया खातीर कुशळटाय विकासाचेर लक्ष केंद्रीत करून वर्सभरांत व्हड उपलब्धी गांठप हो आपलो संकल्प आशिल्ल्याचें मुख्यमंत्री डॉ. प्रमोद सावंत हांणी आमचे प्रतिनिधी कडेन उलयतना सांगलें.
फीट इंडिया खाला गोंयचीं भुरगीं, तरणाटे, तरणाट्यो, बायलां, ज्येश्ठ नागरीक हांचे खातीर विवीध उपक्रम हातांत घेवप, खेळ, योगा, प्राणायाम, आयुर्वेद आनी हेर माध्यमांतल्यान जागृताय करतना दरेक घरांतल्या पुराय परिवाराची भलायकी बरी कशी उरतली हे खातीर आमचे यत्न आसतले अशें तांणी सांगलें.
स्वयंपूर्ण गोंयचो नारो आमी दिला. ताका गोंयच्या लोकांनी व्हड प्रतिसाद दिला. हाचे मुखारूय कुशळटाय विकासाचेर लक्ष केंद्रीत करतना खूबशा मळार प्रशिक्षण दिवप, दरेक हाताक काम दिवप, घराघरा कणकणीं समृद्धीचो संकल्प आशिल्ल्याचें मुख्यमंत्र्यांनी म्हणलें. बायलां, शेतकार हांचेर अदीक भर दितना दरेक मळार तरणाट्या पसून ज्येश्ठा मेरेन खूबशे नाविन्य पूर्ण अशा कुशळटाय विकसीत करपी उपक्रम राबयतले. वर्सभरांत व्हड उपलब्धी गांठप हो आमचो संकल्प आशिल्ल्याचें मुख्यमंत्री डॉ. प्रमोद सावंत हांणी सांगलें.
गोंयच्या लोकां मदीं आत्मविस्वास निर्माण करपाक आमकां येस आयलां. केंद्र आनी राज्यांतल्या विवीध येवजण्यांचो लाव दरेक घरांत मेळचो हे खातीर संघटीत यत्न सुरू आसात आनी तातूंत व्हड येस मेळ्ळां. आयज मेरेन मुख्यमंत्री ह्या नात्यान म्हजे परीन सगल्या घटकांक न्याय दिवपाचो प्रामाणीक यत्न केला अशें तांणी म्हणलें.
वर्सभरांत 2002 वर्सा विकासाच्यो खूबश्यो येवजण्यो आमी चालीक लावंक शकले. खूबशे प्रलंबीत विशय हाता मेकळे केले हाचे निश्चीत समाधान आशिल्ल्याचें मुख्यमंत्र्यांनी सांगलें.
2024 वर्सा परतून एकदां देशांत नरेंद्र मोदी प्रधानमंत्री जातले. गोंयच्यो दोनूय लोकसभेच्यो सुवातो भाजप जिखतलो आनी ते खातीर तयारी सुरू आसा. अयोध्या नगरीत राम मंदीर उबें रावलां. देशांत खुशालकायेचें वातावरण आसा. वैभवशाली, गौरवशाली इतिहास आशिल्ल्या भारतान मोदी हांच्या फुडारपणा खाला संवसारांत नामना मेळयल्या. खर्या अर्थान आयज आमचो भारत देश वैभवाचे तेंगशेर आसा. गोंयांत खूबशे नवे प्रकल्प, नवे उद्देग आनी खूबशे क्रांती घडोवपी उपक्रम राबोवपाचो आमचो निश्चेव आनी संकल्प आशिल्ल्याचें मुख्यमंत्री डॉ. प्रमोद सावंत हांणी सांगलें.
ह्या वेळार तांणी नव्या वर्सा खातीर गोंयच्या लोकांक शुभेत्सा दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
