भांगरभूंय | प्रतिनिधी
पणजी : केंद्र आनी महाराष्ट्र सरकाराच्या यत्नांतल्यान तयार जावपी एक्स्प्रेस वेक लागून येरादारी वेवस्थे सयत पर्यटन आनी रोजगार चालीक लागता. दिल्ली-मुंबय एक्सप्रेस वेक लागून आतां नागपूर ते गोंयां मजगतीं ७६० किमी लांबायेचो मार्ग तयार करतात. महाराष्ट्र शासनाच्या ह्या प्रकल्पाच्या माध्यमांतल्यान राज्यांत वट्ट ११ जिल्हे जोडटले. तशेंच हो एक्सप्रेस वे सुरू जाल्या उपरांत नागपूर ते गोंय प्रवासाचो वेळ रोखडोच पुराय जातलो.
गोंयच्या खुबशे भावीक महाराष्ट्रांत भोंवडेक वतात. अष्टविनायक यात्रा, कोल्हापूर, पंढरपूर, माहुरगढ, गाणगापूर, अक्कलकोट हांगा गोंयकारांच्यो बर्योच पावटी आसतात. सध्या नागपूर ते गोंय हे अंतर पार करपा खातीर २०-२१ वरां लागतातूच. हे एक्सप्रेसवेक लागून आतां हें अंतर फकत ७ वरांनी पुराय जातलें. ह्या एक्सप्रेस वे वरवीं पूर्व, पश्चीम आनी दक्षीण महाराष्ट्रांतले ३ शक्तिपीठ आनी २ जोतिर्लिंग गोंयां कडेन जोडटले. तशेंच ह्याच मार्गान महाराष्ट्र आनी देशांतल्या हेर भागांतले पर्यटक गोंयांत येतले. ताका लागून पश्चीम-दक्षिण महाराष्ट्र आनी गोंयांक पर्यटनाचे नदरेन बरोच फायदो जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
