भांगरभूंय | प्रतिनिधी
उत्तर गोंयांत १,५०० अतिरिक्त पुलीस तैनात
पणजी, प्रसाद शेट काणकोणकार : आयज २०२३ वर्साचो निमाणो दीस. आयज गोंयकार तशेंच गोंयांत आयिल्ले लाखांनी देशी, विदेशी पर्यटक थर्टीफस्ट नायट मनयतले. हे फाटभूंयेर सोर्याचे नशेंत गाडी चलोवपी तशेंच येरादारी नेम मोडप्यांचेर कारवाय करपा खातीर उत्तर गोंयांत सुमार १,५०० पुलिसांची वेवस्था पुलीस खात्यान केल्या. येरादारी नेम मोडप्यांचो चुरको करिनातना तांचेर खर कारवाय करपाचे निर्देश पुलिसांक दिल्यात. ताका लागून येरादारी पुलीस सज्ज आसात.
थर्टी फर्स्ट निमतान गोंयांत येवपी पर्यटक सोर्याचे धुंदींत वाहनां चलयतात. ताका लागून अपघात जातात. हाचेर नियंत्रण मेळोवपा खातीर येरादारी पुलिसांनी अंदूं उत्तर गोंयच्या कळंगूट, बागा, हणजुणें, पर्वरी, पणजी आनी हेर वाठारांनी चड १,५०० पुलिसांची वेवस्था केल्या. पियेवन गाडी चलोवपी चालकांचेर कारवाय करपा खातीर ८० अल्कोमीटर दवरल्यात. ताका लागून आयज, फाल्यां सोर्याचे धुंदींत वाहनां चलोवपी पुलिसांक सांपडल्यार तांचेर खर कारवाय जातली.
कळंगुटे दर्यादेगेर पर्यटकांची बरीच गर्दी पळोवपाक मेळटा. ताका लागून ह्या वाठारांत येरादारी वेवस्था सांबाळपा खातीर ३०० अतिरिक्त पुलिसांची नियुक्ती केल्या. ह्या वाठारांत पुलीस दीस रात गस्तीचेर आसतले, अशी म्हायती पुलीस खात्यांतल्या सुत्रांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
