भांगरभूंय | प्रतिनिधी
कागाळ करपाक कळाव आनी वैजकी पुरावे नाशिल्ल्यान दुबावित निरपराधी
पणजी ः लग्नाचे हांयस दाखोवन चलये कडेन लिंगीक संबंद दवरलो. ते उपरांत दुबावितान वेगळी जात आशिल्ल्याचे सांगून लग्न जावपाक न्हयकार दिलो. ह्या प्रकरणांत कागाळ दाखल करपाक कळाव जाल्ल्यान आनी दुबाविता आड वैजकी पुरावे मेळूंक नाशिल्ल्यान न्यायालयान दुबाविताक निरपराधी थारायलो. पणजेच्या जलदगती न्यायालयाचे न्यायाधीश दुर्गा मडकईकार हांणी हे संबंदी निवाडो दिला.
पिडितेच्या बापायन 19 जानेवारी 2016 दिसा फोंडें पुलिशेंत कागाळ दाखल केल्ली. ते प्रमाण पिडित बायल आनी दुबावीत एकाच सुवातेर काम करताले. दुबावितान पयलीं तिचे कडेन इश्टागत करून तिका लग्नाचें हांयस दाखयलें. उपरांत दुबावितान मार्च 2015 ते नोव्हेंबर 2016 ह्या काळांत पिडित बायलेक प्राणीसंग्रहालयांत व्हेले. थंय आनी हायवेचे कुशीक गाडयेंत तिचे इत्सेआड जायते फावटीं लिंगीक अत्याचार केलो आनी उपरांत दुबावितान तिका वेगळी जात आशिल्ल्याचे कारण दिवन लग्न करपाक न्हयकार दिलो अशें कागाळींत म्हणलां.
फोंडें पुलिसांनी 19 जानेवारी 2016 दिसा दुबाविताचेर भारतीय दंड संहितेच्या कलम 376 (बलात्कार) आनी कलम 420 (फटवणूक) खाला गुन्यांव नोंद केलो. उपरांत पुलिसांनी 23 मार्च 2016 दिसा दुबाविताक अटक केली. ताका तेच दीस जामीन मेळ्ळो. उपरांत पुलिसांनी 20 जून 2016 दिसा दुबाविताचेर न्यायालयांत आरोपपत्र दाखल केलें. न्यायालयान दुबाविता आड प्रथमदर्शनी पुराव्यांची दखल घेवन 22 जानेवारी 2020 दिसा आरोप थारायले आनी सुनावणी घेतली.
अॅड. ओ. फर्नांडिस बाजू मांडली. पिडित बायलेन कागाळ दाखल करपाक कळाव कित्याक केलो हाचें कारण सांगूंक ना. तशेंच दुबाविता आड वैजकी पुरावे नात. बापायच्या सांगण्या वयल्यान कागाळ दाखल केल्या. हाचे भायर पिडित बायल सोडल्यार हेर कोणूच साक्षीदार ना. तशेंच पंच साक्षीदार जायत्या गुन्यांवांनी साक्षीदार आशिल्ल्यान ताची गवाय योग्य धरना असो युक्तिवाद करून दुबाविताक निरपराधी थारावपाची मागणी तांणी केली. हे प्रकरणांत न्यायालयान दोनूय पक्षांच्या बाजूंचो विचार करून आनी वैजकी पुराव्यांची दखल घेवन दुबाविताक निरपराधी थारायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
