भांगरभूंय | प्रतिनिधी
मडगांव, प्रतिनिधी ः प्रधानमंत्री नरेंद्र मोदी 30 तारखेक मडगांव – मंगळूर सयत हेर 5 मार्गां वयल्या वंदे भारत आनी 2 अमृत भारत रेल्वेंचें उक्तावण करतले.
अंदू गोंयांत जून म्हायन्यांत मडगांव ते मुंबय मार्गाचेर पयलीं वंदे भारत सुरू जाल्ली. आतां कोंकण रेल्वे मार्गाचेर चलपी गोंया खातीर दुसरी सेमी हायस्पीड वंदे भारत गाडी मडगांव जंक्शन ते मंगळूर मार्गाचेर चलतली. ही सेवा 30 डिसेंबर सावन सुरू जातली.
मंगळुरु – मडगांव वंदे भारत एक्सप्रेस मंगळूरू सेंट्रल सावन सकाळीं 8.30 वरांचेर सुटतली आनी दनपारां 1.15 वरांचेर मडगांव जंक्शनाचेर पावतलीं. जाल्यार मडगांवच्यान दनपारां 1.45 वरांचेर सुटपी वंदे भारत सांजेच्या 6.30 वरांचेर मंगळुरू पावतली. ही गाडी उडुपी आनी कारवार स्टेशनाचेर थांबतली.
मंगळुरुतल्यान सुटून गोंयांत पावपी दुसरी वंदे भारत गाडयेक येवकार दिवपा खातीर मुख्यमंत्री डॉ. प्रमोद सावंत, आमदार दिगंबर कामत आनी हेर मानेस्त मडगांव स्टेशनाचेर हाजीर आसतले अशी म्हायती रेल्वे प्रशासनान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
