भांगरभूंय | प्रतिनिधी
भांगरभूंय । प्रतिनिधी
वाळपयः 28 गांवांचो आसपाव करून म्हादय अभयारण्याची अधिसूचोवणी 1999 वर्सा अधिसूचीत केल्ली. अभयारण्याचो शिमो अजून मेरेन अधोरेखीत करूंनात. 4(1) खाला अभयारण्य कलमाची पूर्तता करून सरकाराक 26 (आ) ह्या कलमाची पूर्तता करपा खातीर घाई गडबड लागल्या. सरकारान राजू देसाय हाची सेटलमेंट अधिकारी म्हणून नियुक्ती केल्या. अभयारण्य वाठारांत आसपाव केल्ल्या 22 गांवतल्या जमीनधारकांचो जमनी हातूंस आसपावीत केल्यात. ते संबंदीचीं नावां पुराय करपा खातीर फकत 29 दीस बाकी आसात. 17 जानेवारी पयलीं ते सादर करपाची गरज आसा. ना जाल्यार जमनी आसपावीत केल्ल्यात तांच्या नांवार अभयारण्य अधिसूचोवणी लागून जावंन जमनी पसून विस्थापीत जावपाची भिरांत न्हयकारपाक जायना.
सरकारा घाई करपाचें सोडून पी व्ही सावंत समितीच्या निकालाची अंमलबजावणी करची. ताणे दिल्ल्या निकाला प्रमाण जमनी अधिसूचोवणेल्या भायर काडच्यो. अधिकाऱ्यां कडेन आशिल्ले राना हक्क दावे बेगोबेग निकालांत काडचे. ना जाल्यार सत्तरींतल्या सुमार 40 टक्के लोकांक ताचे खर परिणाम भोगचे पडटले अशी भिरांत सत्तरी शेतकरी संघटने वतीन आयोजीत केल्ल्या पत्रकार परिशदंत उक्तायल्या. पत्रकार परिशदेक संघटनेचे रणजीत राणे, राजेश गांवकार आनी अॅड गणपत गांवकार हाजीर आशिल्ले.
हे संबंदी चड म्हायती दितना राजेश गांवकारा हाणे सांगलें कीं हाचे पयली सावंत हांचो अहवाल सादर केल्या उपरांत तांणी हे संबदी निकाल दिल्लो. ज्यो जमनी लागवडी खाला आसात त्यो अभयारण्य वाठारांतल्यान भायर काडपाची शिफारस केल्ली मात सरकारान ते विशीं अजून लक्ष दिले ना. ह्या निकालपत्राची अंमलबजावणी केल्ली जाल्यार अभयारण्य वाठारा खातीर नवे अधिकारी नियुक्त करपाची गरज नाशिल्ली. सद्या गोंदळाची परिस्थिती तयार करपी प्रकारा संबदी सरकारान विचार करपाची गरज आसा अशें ताणे सांगलें.
राजू देसाय ह्या सेंटलमेंट अधिकाऱ्यान 60 दिसां भितर जांच्यो जमनी अभयारण्य वाठारांत आसपावीत केल्यात तांका दावे सादर करपाक सांगलां. ते संबंदीची कागदपत्रां सादर करपाचो आदेश दिला. मात अजाप म्हणल्यार जमीन धनयांनी आनी शेतकारांनी सादर केल्ले दावे अजून मेरेन निकालांत काडल्ले नात.ते काडिल्ले जाल्यार तांचे कडेन आशिल्ली कागदपत्रां तांका आतां सादर करपाक मेळटाशिल्ली. सद्या जमीन धनयां कडेन कसलेच तरेची कागदपत्रां नात तेन्ना ते तीं कशी सादर करतले, अशें गांवकार हाणे विचारलें
वाळपयचो आमदार विश्वजीत राणे हे राना खात्याचे मंत्री आसात. ताणे हे विशीं लक्ष दिवपाची गरज आसा. परिपत्रकाची मुजत 17 जानेवारीक सोपतली. ताचे पयलीं अभयारण्य 4 (1) हाची पूर्तता जातली. ते उपरात 26 (आ) कलमाची अंमलबजावणी करपाचे नदरेन राना खातें यत्न करतले. ताची पूर्तता जाल्यार अभयारण्य वाठारांत आसपावीत केल्ले जमनींत जमीन धनयांक आनी शेतकारांक पांय लेगीत दवोरपाक मेळचो ना अशी भिरांत रणजीत राणे हाणे उक्तायली.
अभयारण्य वाठारांत आसपावीत केल्ल्या 28 गांवातले सर्वे नंबर अजून मेरेन जाहीर केल्ले नात. ताका लागून शेतकार आनी जमीनधारकांक अभयारण्य वाठारांत कोणाल्यो जमनी आसपावीत आसात ते कळपाक शकलें ना. हे सर्वे नंबर कित्याक जाहीर करनात असो प्रस्न रणजीत राणे आनी गणपत गांवकार हांणी केल्या. हाच्या फाटल्यान व्हडलें शडयंत्र आशिल्ल्याचो आरोप तांणी केला. अभयारण्याक आमचो विरोध ना. पर्यावरणाची राखण करप म्हत्वाचें आसा. मात अभयारण्य वाठारांत आसपावीत केल्लो लागवडी सकयल्लो जमनी, घऱां, देवस्थाना तातूंतल्यान भायर काडपाची मागणी आमी सुरवेक सावन करीत आयल्यात. आतां ही निमणी संद आस. सांवत निकाला प्रमाण सरकारान अंमलबजावणी केल्यार सुमार 99 टक्के समस्या सुटाव्यो जातल्यो अशें गांवकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
