भांगरभूंय | प्रतिनिधी
म्हापशें, प्रतिनिधी: तिळारी धरणाचे उदक कालव्याचे दुरुस्ती खातीर बंद केल्ल्यान बार्देस म्हालांत उदकाची समस्या निर्माण जाल्ली. देड म्हयन्यां उपरांत बुधवारा धरणाचें उदक सोडिल्ल्यान बार्देस म्हाल सुखावलो. पूण घसघश्यांनी व्हांवपी हें उदक घरांनी घुशिल्ल्यान सडयें शिवोलच्या लोकां मुखार व्हड समस्या निर्माण जाल्या.
तिळारी धरण उदकास्रोत विभागान फाटल्या १३ नोव्हेंबराक धरणाच्या कालव्याचें वर्सुकी दुरुस्ती काम करपाक सुरवात केल्ली. ताचे पसून बार्देस आनी पेडणें म्हालांत उदकाचो उणाव जावतालो. ताका लागून पर्वरी उदक शुध्दीकरण प्रकल्प फाटल्या देड म्हयन्या सावन उदकाची पुरवण करतालो. ह्या काळांत पर्वरी पसून साळगांव मतदारसंघांतल्या लोकांक उदकाचे समस्येक तोंड दिवचें पडिल्लें. देड म्हयन्या उपरांत तिळारी धरणाचें दुरुस्ती काम पुराय जाल्या उपरांत बुधवार ता. २७ डिसेंबराक गोंयांत धरणाचें उदक सोडलें. ताका लागून बार्देसांतलो उदकाचो प्रस्न सुटलो.
बिरेस्तार २८ डिसेंबराक सकाळीं सुमार ९ वरांचेर घसघशीत व्हांवपा तिळारी कालव्यांतलें उदक पिलंबीवाडा, सडयां घुसलें. ह्या व्हांवपी उदकाक बरोच नेट आशिल्लो. ताका लागून ह्या वाठारांतले रस्ते उदका पोंदाक गेले. तशेंच रस्त्याच्या शेजराक आशिल्ल्या घरांनी उदक घुसलें. लोकांची धांवपळ जाली. थळाव्या पंचायत मंडळाक लोकांनी हाची म्हायती दिली. पंचायतीन उदकास्रोत अधिकार्यांक कळयलें.
दनपरां उसरां मेरेन ह्या उदकाचो प्रवाह उणो जावंक नाशिल्लो. सरपंच दीपाली पेडणेंकार तशेंच थळाव्यांनी हे घडणुकेचेर तिडक उक्तायल्या. उदकास्रोत खात्यान हाचेर कितेंय उपाय काडपाची मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
