भांगरभूंय | प्रतिनिधी
कतार, खबरां संस्था: कतारांतल्या खाजगी कंपनींत काम करपी आठ आदल्या भारतीय नौदळ अधिकार्यांक कतारांतल्या कनिश्ठ न्यायालयान मरणाची ख्यास्त फर्मायल्ली. पूण आतां ही ख्यास्त रद्द केल्ल्याची म्हायती परराश्ट्र मंत्रालयान दिल्या. पीटीआयन हे विशीं खबर दिल्या.
कतारांतले यंत्रणेन तांकां ३० ऑगस्ट २०२२ दिसा अटक केल्ली. अंदूं २९ मार्चाक तांचे आड खटल्याचे सुनावणेक सुरवात जाली. उपरांत आठ अधिकार्यांक कतारच्या न्यायालयान २६ ऑक्टोबराक हेरगिरीच्या आरोपा वयल्यान मरणाची ख्यास्त दिल्ली. भारतान ताची खर दखल घेवन अधिकार्यांक वाटोवपा खातीर कायदेशीर पावलां उडयिल्लीं. शिक्षेक आव्हान दिवपाची प्रक्रिया सुरू आशिल्ल्याची म्हायती सरकारा वतीन फाटल्या सप्तकांत दिल्ली. ह्या अपिलाचो सकारात्मक परिणाम जातलो आस्त भारता वतीन उक्तायल्या. कांय खबरां संस्थांच्या मतान, ही ख्यास्त उणी केल्या. मरणाची ख्यास्त रद्द केल्या, तरी बंदखण भोगची पडूं येता. ती कितलो तेंप ते विशीं अजून स्पश्ट जावंक ना.
कोण हेआदले नौसैनीक?
कॅप्टन नवतेजसिंग गिल, कॅप्टन सौरभ वसिष्ठ, कमांडर पुरेनेन्दु तिवारी, कॅप्टन बिरेंद्र कुमार वर्मा, कमांडर सुगुनाकर पकाला, कमांडर संजीव गुप्ता, कमांडर अमित नागपाल आनी खलाशी रागेश अशीं ह्या अधिकाऱ्यांचीं नांवां. हे सगळे भारतीय अल दाहरा ग्लोबल टेक्नॉलॉजीस ऍण्ड कन्सल्टन्सी सर्व्हिसेस ही संरक्षण सेवा दिवपाचे कंपनींत काम करताले. रॉयल ओमान एअर फोर्सांतल्या निवृत्त जाल्ले नागरीक खमीस अल अजमी हांची ही कंपनी. ह्या आठ भारतीयां वांगडा तांकांय अटक केल्ली. पूण, नोव्हेंबर २०२२ दिसा तांकां सोडिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
