तिळारेचें उदक फाल्यां २८वेर सांजेच्या ४ ते ५ मेरेन पावतलें
भांगरभूंय | प्रतिनिधी
पणजी,प्रतिनिधी : काम पुराय जाले उपरांत पांच दिसांनी तिळारी धरणाच्या कानालाचें दार उक्तें करपाचे आशिल्ले. आयज पांचवो दीस. आयज दार उक्तें केल्ल्यान धरणाचें उदक गोंयचे दिकेन येवपाक लागलां. फाल्यां २८वेर सांजेच्या ४ ते ५ मेरेन पावतलें अशी म्हायती भौशीक बांदकाम अभियंते संतोष म्हापणे हांणी दिली.
तिळारीच्या कानालाचें काम २२ डिसेंबराक पुराय जाल्लें. पूण ह्या दार आडकल्ल्यान धरणांतल्यान गोंयांक उदकाची पुरवण करप कठीण जाल्लें. हाचो व्हड फटको उत्तर गोंयच्या बार्देस, पेडण्यां सयत हेर म्हालांतल्या लोकांकूय बशिल्लो. बार्देस आनी पेडणेंचे जनतेक पर्वरीच्या जलशुद्धीकरण प्रकल्पांतल्यान उदकाची पुरवण जाता. पूण, महाराष्ट्र सरकारान तिळारी कालव्यांच्या कामा खातीर फाटल्या देड म्हयन्या सावन उदक बंद दवरिल्लें.
राज्यांत नातालां आनी नवें वर्स मनोवपा खातीर लाखांनी पर्यटक आयल्यात. ह्या वेळार पर्वरेचो उदका प्रकल्प बंद आशिल्ल्यान लोकांक जाय तितली पसून उदकाची पुरवण जायना. ताका लागून थळाव्यांक त्रास सोंसचे पडल्यात. आतां उदक गोंयचे दिकेन येवपाक सुरू जालां.
उदक तिळारी धरणांतल्यान गोंयांत येतना कसलेच तरेची आडखळ येना जाल्यार फाल्यां २८वेर सांजेच्या ४ ते ५ मेरेन उदक गोंयांत पावतलें. उपरांत गिरी हांगच्यान पंपींग करून तें पर्वरी उदक शुद्धीकरण प्रकल्पांत सोडटले. थंय प्रक्रिया करून त्याच दिसा उदक लोकांक दितले. उदकाचेर प्रक्रिया करून तें लोकांक दिवपाक आमी सज्ज आसात, अशें अभियंते म्हापणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
