भांगरभूंय | प्रतिनिधी
30 डिसेंबर मेरेन उत्तर गोंयाक गरजे प्रमाण उदकाची पुरवण
पणजी ः तिळारी कानालाचें काम 22 डिसेंबराक पुराय जाले तरी गोंयांत अजून उदक सोडूंक ना. हाका लागून पर्वरीचो उदक शुध्दीकरण प्रकल्प बंद आशिल्ल्यान उत्तर गोंयांत पिवपाच्या उदकाची गंभीर समस्या निर्माण जाल्या. तिळारी सावन गोंयांत उदक बेगीन पावलें जाल्यार 30 डिसेंबर मेरेन उदका पुरवण समस्या सुटावी जातली अशी म्हायती भौशीक बांदकाम खात्याच्या सूत्रांनी दिली.
तिळारी धरण बांदून 30 वर्सां परस चड काळ जाल्ल्यान महाराष्ट्र सरकारान ह्या धरणांतल्यान महाराष्ट्र आनी गोंयांत उदक पुरवण करपी कानालांची दुरुस्ती करपाक सुरवात केल्ली. गोंय सरकाराक दिल्ले आश्वासना प्रमाण महाराष्ट्र सरकारान तिळारी कानालाचें काम 22 डिसेंबराक पुराय केले. देखून 23 डिसेंबर सावन गोंयांत उदकाची पुरवण जातली आनी पर्वरी प्रकल्प पुराय जाले उपरांत फुडल्या दोन दिसांनी उत्तर गोंयच्या लोकांक उदक मेळटलें अशेंय उदका स्रोत मंत्री सुभाष शिरोडकार हांणी सांगिल्लें. पूण 22 डिसेंबराक काम पुराय जालें तरी तिळारींतल्यान अजून गोंयांत उदक पावूंक ना. ताका लागून पर्वरींतलो उदका प्रकल्प सुरु जावंक नाशिल्ल्यान उत्तर गोंयच्या लोकांक उदकाचो त्रास सोंसचो पडटा.
तिळारी कानालांचे काम सुरु केले उपरांत उदका आनी भौशीक बांदकाम खात्यान अंजुणे, अस्नोडा हांगाच्यान उत्तर गोंयाक उदकाची पुरवण केली. ह्या काळांत पर्वरीचो उदक शुद्धीकरण प्रकल्प बंद उरलो. देखून नागरिकांक मर्यादीत उदक मेळ्ळें. पूण उदकाचो व्हडलोसो प्रस्न नाशिल्लो. पूण सध्या राज्यांत नाताळ सुरु आसा, नव्या वर्साक येवकार दिवपा खातीर लाखांनी देशी-विदेशी पर्यटक गोंयांत आसात. अशे परिस्थितींत अजून तिळारीचें उदक सोडूंक नाशिल्ल्यान उत्तर गोंयांत उदकाची व्हड समस्या निर्माण जाल्या. तिळारीचें उदक आयज वा फाल्यां गोंयांत पावल्यार ताचेर प्रक्रिया करपाक उण्यांत उणे दोन दीस लागतले आनी 30 डिसेंबर मेरेन उत्तर गोंयच्या लोकांक गरजे प्रमाण उदकाची पुरवण करप शक्य जातलें अशें पीडब्ल्यूडी सूत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
