भांगरभूंय | प्रतिनिधी
फोंडें, प्रतिनिधी: बायथाखोल-बोरये रस्त्या कुशीक पार्क केल्ल्या ट्रकाक लायटीच्या सरयांचो स्पर्श जाल्ल्यान ट्रकाचे तीन टायर जळ्ळे. ह्या वाठारांत रस्त्या कुशीक मातयेची रांस मारिल्ल्यान सध्या लायटीच्यो सरयो सामक्यो सकयल देंवल्यात. ताका लागून आनीक अपघात जावपाची शक्यताय वाडल्या. वीज खात्यान हांगा लक्ष घालून ही स्थिती सुदारपाची गरज आसा.
मेळिल्ले म्हायती प्रमाण, मंगळारा सकाळीं एमएच -०६- बीडी- ००७७ क्रमांकाचो ट्रक रस्त्याच्या कुशीक पार्क करून चालक हेर कडेन गेल्लो. चालक गेल्या उपरांत लायटीच्या सरयांक ट्रक तेंकिल्ल्यान ताचे टायर जळपाक लागले. त्या वेळार थंयच्यान पासार जावपी फोंडेंचे समाजसेवक विराज सप्रे हांणी रोखडोच वीज अभियंत्यांक फोन करून ट्रक जळटा हाची म्हायती दिल्या उपरांत लायट उडयली. ताका लागून व्हड अपघात जावपा पसून वाटवलो. पूण हातूंत ट्रकाचें लुकसाण जालें.
बायथाखोल ते कुर्टी ह्या बगल रस्त्याच्या रुंदीकरण करपी कंत्राटदारान ह्या वाठारांत व्हडा प्रमाणांत मातयेची रास उडयल्ल्यान रस्तो रूंद जाला. तशेंच लायटीच्यो सरयो सामक्यो सकयल देंविल्ल्यान वाहन चालकांक तांचो अंदाज येना. ताका लागून रातच्या वेळार लायटीच्या सरयांचो अंदाज येनाशिल्ल्यान रस्त्याचे कुशीक पार्क करपी ट्रक चालकांक धोको निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
