विद्यालयांनी चोरी: शेनवारा कुडण्यां, काल मोल्यां
भांगरभूंय | प्रतिनिधी
दिवचल, प्रतिनिधी: गोंयांत चोरयेच्यो घडणुको वाडतूच आसात. आतां चोरांनी शााळांक लेगीत सोडूंक ना. जंय चोरी करप पाप अशें विद्यार्थ्यांक ल्हानपणा सावनूच शिकयतात थंय चोरयो जावपाक लागल्यात. शेनवारा कुडणेच्या महालक्ष्मी हायस्कुलांत शेनवारा रातची दार फोडून चोरी केली. विद्यालयांतल्या ड्रॉवरांतले सुमार साठ ते सत्तर हजार रुपया चोरांनी फारायले.
मजगतीं, सोमारा रातचें मोलेंच्या अभिनव विद्यामंदीर विद्यालयांत चोरांनी चोरी करपाचो यत्न केलो. पूण तांकां अपेस आयलें. चोरांक हांगा कांयच मेळूंक ना. कुळें पुलिसांनी घडणुके सुवातेर हाजीर रावन चवकशी केली.
कुडणेंच्या महालक्ष्मी हायस्कुलाचे अध्यक्ष ज्ञानेश्वर मलीक हांणी दिवचलच्या पुलीस स्टेशनांत कागाळ नोंद केल्या.
शेनवारच्यान सगळ्या शाळांक सुटी पडल्या. हाचो फायदो घेवन चोरांनी चोरी केली.
मेळिल्ले म्हायती प्रमाण महालक्ष्मी हायस्कुलाच्या धावेच्या विद्यार्थ्यांची परीक्षा फी घेतिल्ली. पूण इंटरनेट सायट सुरू जायनाशिल्ल्यान ती भरूंक नाशिल्ली. ही रक्कम शाळेंतल्या ड्रॉवरांत आशिल्ली. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
