भांगरभूंय | प्रतिनिधी
देशांतलो आंकडो पावलो 4,054 चेर, कोरोनाचे दुयेंती 3,742
पणजी, बातमीदार ः दोन वर्सां पयलीं भारता सयत सगल्या संवसाराक सतायिल्ल्या कोरोना धामीन परतून तकली वयर काडल्या. कोरोना दुयेंतींचो आंकडो नेटान वाडत दिसता. व्हायरसाचो एक उपप्रकार जेएन.1 हो नेटान पातळत आसा. ह्या व्हायरसाची लागण जाल्लो पयलो दुयेंती केरळांत सांपडलो. त्या कोरोनाचोय दुयेंती केरळांतूच मेळिल्लो. आतां हो व्हायरस सुमार स राज्यांनी पावला. हातूंत गोंयचोय आस्पाव जाता. एएनआयन हे संबंदी अहवाल दिला. शेजराच्या महाराष्ट्रांतय कोरोना दुयेंतींची संख्या भिरांकूळ आसा.
देशांत आंकडो चार हजारां वयर
सध्या देशांत 4 हजार 054 सक्रीय कोरोना दुयेंती आसात. 25 डिसेंबराक (24 वरांनी) दनपरां मेरेन देशांतल्या स राज्यांनी जेएन.1चे 63 दुयेंती सांपडल्यात. तातूंतले 34 गोंयांत, 9 महाराष्ट्रांत, 8 कर्नाटकांत, 6 केरळांत, 4 तमिळनाडूंत आनी 2 तेलंगणांत सांपडल्यात.
संवसारीक भलायकी संघटनेन जेएन.1 ह्या कोरोना व्हायरसाच्या नव्या उपप्रकाराचें वर्गीकरण ‘वेरिएंट ऑफ इंटरेस्ट’ ह्या गटांत केलां. पूण हो व्हायरस लोकांचे भलायकेक व्हडलोसो धोको निर्माण करिना अशेंय तांणी स्पश्ट केलां. आतां मेरेन मेळिल्ल्या पुराव्यां प्रमाण जेएन.1 भलायके खातीर चड धोक्याची ना. सध्या उपलब्ध आशिल्लीं लस कोरोनाक प्रतिकार करतात आनी भलायकेच्या धोक्यांतल्यान दुयेंतींक राखण दितात अशें संवसारीक भलायकी संघटनेन निवेदन दिलां.
भारताक कितलो धोको?
संवसारांत फाटल्या कांय दिसां सावन पिरोला आनी जेएन-1 उपप्रकाराक लागून कोरोना दुयेंतींची संख्या निश्चीतपणान वाडल्या. अमेरिकेंत, सिंगापूर, चीन आनी कांय युरोपी देशांनी ह्या दोनूय उपप्रकारांक लागून जायत्या दुयेंतींक कोरोनाची लागण जाल्ल्याचें दिसून आयलां. भारतांत 8 डिसेंबराक केरळ राज्यांत ह्या व्हायरसाचो पयलो दुयेंती सांपडलो. ते उपरांत केंद्र सरकारान खबरदारीचे उपाय करपाक सुरवात केल्या. ते उपरांत केरळ, कर्नाटक राज्यांनी आतां मेरेन भलायकेची जतनाय घेवची अशें सांगलां.
स्वताची राखण कशी करची?
तज्ञांच्या म्हणण्या प्रमाण फुडाराक सार्स-कोव्ही-2चे नवे प्रकार दिसत रावतले. पूण श्वसन तंत्राचेर हल्लो करपी व्हायरसांआड संरक्षणाची पद्दत तशीच उरतली. तुमच्या वाठारांत कोरोना दुयेंतीचो आंकडो वाडला जाल्यार गर्दीच्या सुवातेर फेस मास्क लावचो. उक्त्या हवेच्या जाग्यार रावल्यार कोरोनाची लागण जावपाची शक्यताय उणी जाता. परत परत हात धुवचे अशें जाणकारांनी सांगलां.
कोरोनाचे दुयेंतीय वाडले
सध्या देशांत 3,742 सक्रीय कोरोना संसर्ग जाल्ले दुयेंती आसात. हातूंतले चडशे दुयेंती केरळांत आसात. फाटल्या 24 वरांत केरळांत 128 नवे कोरोनाचे दुयेंती सांपडल्यात. फकत केरळांत 3000 सक्रीय कोरोना संसर्ग जाल्ले दुयेंती आसात. कर्नाटकांत 271 सक्रीय कोरोना संसर्गजन्य दुयेंती आसात. फाटल्या 24 वरांत कर्नाटकांत 96 नवे दुयेंती सांपडल्यात. हे वळेरेंत महाराष्ट्राचो तिसरो क्रमांक आसा. फाटल्या 24 वरांत राज्यांत 35 नवे दुयेंती सांपडल्यात. हाचे वांगडाच सध्या राज्यांत 103 कोरोना दुयेंतींचेर उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
