भांगरभूंय | प्रतिनिधी
-्फोवोश्यां प्रमाणांत उत्पादन, पोरूंचे तुळेंत अंदूं 4 टनांनी वाड
पणजी : फलोत्पादन म्हामंडळाक थळाव्या शेतकारां कडल्यान मेळपी तवशीं, भेंडें आनी दुदी भोपळ्याच्या उत्पादनांत मोट्या प्रमाणांत वाड जायत आसा. ताका लागून फलोत्पादन म्हामंडळान फाटल्या 10 दिसां पसून बेळगांवच्यान तवशीं, भेंडें आनी दुदी भोपळ्याची आयात करूंक ना, अशी म्हायती म्हामंडळाचे वेवस्थापकी संचालक चंद्रहास देसाय हांणी दिली.
कोरोना म्हामारी उपरांत राज्यांतल्या शेतकारांनी भाजयांच्या उत्पादनांत आघाडी घेतल्या. जायत्या युवा शेतकारांनी भाजयांच्या लागवडीक प्राधान्य दिला. ताका लागून जायत्या भाजयांचें उत्पादन वाडत आसा.
2022 त राज्यांतल्या शेतकारां कडल्यान फलोत्पादन म्हामंडळाक सुमार 8 टन तवशीं मेळिल्लीं. अंदूं मात ती 13 टनां वयर पावल्या. तशेंच पोरूं 8 टन भेंडें मेळिल्लें, अंदूं तातूंत 4 टनांनी वाड जाल्या. थळाव्या शेतकारां कडल्यान मेळपी तवशीं, भेंडें गोंयकारांक फावोश्या प्रमाणांत आसात. ते खातीर फाटल्या 10 दिसां पसून म्हामंडळान बेळगांव मार्केटांतल्यान भाजयांची आयात करूंक ना, अशें चंद्रहास देसाय हांणी म्हणलें.
अंदूंच्या मॉन्सून हंगामांत देशभरां सयत गोंयांतूय उसरा पावसाक सुरवात जाली. पूण ते उपरांत 22 जून पसून पावसान राज्यांत हजेरी लायली. सुमार एक म्हयनो सातत्यान पावस पडले उपरांत पावसाचें प्रमाण उणें जालें. ते उपरांतचें राज्यांतलें वातावरण भाजयांच्या उत्पादनाक पुश्टीक थारले. ताका लागुनूच तवशीं, भेडें हांच्या उत्पादनांत वाड जाली. फुडल्या काळांत ह्या उत्पादनांत आनीक वाड जातली, असो विस्वास देसाय हांणी उक्तायलो.
सध्या श्रावण म्हयनो चालू आसा आनी उपरांत चवथीच्या काळांत राज्यांत भाजयांची मोट्या प्रमाणांत गरज आसा. ताका लागून म्हामंडळाच्या स्टॉलधारकांक दरेक दिसा भाजयांची ऑर्डर दिवपाची सुचोवणी म्हामंडळान केल्या, अशी म्हायती चंद्रहास देसाय हांणी दिली. चवथीच्या काळांत गोंयकारांक सरासरी 20 टन अदीक भाजयांची गरज लागता, अशेंय तांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
