भांगरभूंय | प्रतिनिधी
म्हालेखापाल अहवालांतलो निश्कर्शः 2025 कोटींची रकक्म 3 वर्सां परस चड काळ थकीत
भांगरभूंय । प्रतिनिधी
पणजी : पगार, पेन्शन आनी रिणाच्या कळंतराचेर खर्चांतली 49 टक्के रक्कम खर्च जायत आसली तरी वाणिज्य कर तशेंच बिलांचे थकबाकी वसुलीचें प्रमाण उणें आसा. विवीध कर, विजेचें बील, उदकाचें बील मेळून 31 मार्च 2022 मेरेन 4,763 कोटींची रक्कम थकीत आसा. हे रक्कमेंतली 2,025 कोटींची रक्कम 3 वर्सां परस चड तेंप थकीत आसा. म्हालेखापालाच्या अहवालांतलो हो निश्कर्श आसा.
ही थकबाकी 31 मार्च 2022 मेरेनची आशिल्ल्याचें अहवालांत स्पश्ट केलां. उदकाची थकबाकी वसूल करपा खातीर सरकारान एकरकमी बील फारीक करपी (ओटीएस) येवजण सुरू केली. हे येवजणेंतल्यान 11 कोटी रुपयांची वसुली जाली. 12 कोटींची दंडाची रकक्म खात्याक माफ करची पडली. वीज बिलांची थकबाकी वसूल करपा खातीर खात्यान ओटीएस येवजण सुरू केली. हे येवजणेंतल्यान सगळी प्रलंबीत रक्कम फारीक जावंक ना. हाका लागून वीज तशेंच उदकाच्या बिलांची थकबाकी कायम आसा.
वेवसायीक शुल्क खातें, वीज खातें, उदका पुरवण खातें, भौशीक बांदकाम खातें, अबकारी खातें, पर्यटन खातें, पुलीस म्हासंचालक, गोरवां पोसपी आनी गोरवां सांबाळ खातें, छापणावळ खातें, येरादारी खातें, सहकार खातें, नगरनियोजन खातें, रान खातें, शेती खातें, उद्देग आनी वाणिज्य खातें ह्या खात्यांची थकबाकी आसा.
सगळ्यांत चड थकबाकी उदकाची आसा. 2069.87 कोटी इतली उदकाची थकबाकी आसा. उदकाचें बील भौशीक बांदकाम खातें आकारता. म्हालेखापालांच्या अहवालांत मात उदकाचो कर उदका पुरवण खात्या कडेन वर्ग केला. उदकाच्या करा उपरांत वेवसायीक कर खात्याची थकबाकी 2,003 कोटींची आसा. वीज खात्याची थकबाकी 507.32 कोटींची आसा. भौशीक बांदकाम खात्याची थकबाकी 101.45 कोटींची आसा. सगळी थकबाकी 4,762.89 कोटी जाता.
राज्याच्या साधनसुविधांतल्यान सरकाराक वर्साक अदमासे 9,592 कोटींचो महसूल मेळटा. ही थकबाकी महसुलाच्या 50 टक्के आसा. मात ही थकबाकी बऱ्याच वर्सांची आसा, अशें म्हालेखापालांनी अहवालांत म्हणलां.
सरकारान थकबाकी वसूल करपा खातीर उपाय घेवचे. थकबाकी वसूल जाली जाल्यार महसूल वाडून महसुलांतलो उणाव उणो जावपाक मजत जातली, अशें म्हालेखापालांनी अहवालांत म्हणलां.
2025 कोटी 3 वर्सां परस चड वर्सां प्रलंबीत
विवीध खात्यांची जी 4763 कोटींची कर थकबाकी आसा, तातूंतली 2025 कोटी रुपयांची थकबाकी 3 वर्सां परस चड तेंप प्रलंबीत आसा. उदकाचो 410 कोटींचो कर 3 वर्सां परस चड तेंप प्रलंबीत आसा. विजेचो 220 कोटींचो कर 3 वर्सां परस चड तेंप प्रलंबीत आसा. वेवसायीक खात्याचो 1,320 कोटींचो कर 3 वर्सां परस चड तेंप प्रलंबीत आसा.
बंद उद्देग, न्यायालयीन खटल्यांक लागून
वसुलीक आडखळ : मुखेल वीज अभियंतो
म्हालेखापालाच्या अहवालांतली म्हायती आनी आकडे खात्यान सादर केल्ले म्हायतीचेर आदारीत आसता. वीज खात्याची कांय थकबाकी 20 वर्सां, 30 वर्सां सावन वसूल जावपाची आसा. काय थकबाकीचे न्यायालयांत खटले चालू आसात. कांय उद्देग खूब वर्सां आदीं बंद जाले. उद्देगांच्या धनयांचो पत्तो लागना. ओटीएस येवजणेक लागून दंडाची रक्कम माफ जाता. हाची थकबाकी म्हूण लेखापरिक्षणांत नोंद जाता, अशें मुखेल वीज अभियंते स्टीफन फर्नांडीस हांणी सांगलें.
खातें थकबाकी (कोटी)
वेवसायीक 2003.40
वीज 07.32
उदका पुरवण 2074
भौशीक बांदकाम 101.45
अबकारी 2.42
पर्यटन 2.0
पुलीस 6.38
गोरवां सांबाळ 34.88
छापणावळ 6.98
येरादारी 19.63
नगरनियोजन 0.60
रान 0.35
शेतकी 0.29
उद्देग 0.24 वट्ट 4763
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
