भांगरभूंय | प्रतिनिधी
-उपमहानिरिक्षक डॉ. कोन हांचेर कारवाय, सगल्यां पदांचो ताबो घेतलो काडून
पणजी : कळंगूटेंतल्या पबांत एके पर्यटक बायले कडेन गैरवर्तन करप पुलीस उपमहानिरिक्षक आयपीएस डॉ. ए. कोन हांकां बरेच म्हारग पडलां. तांचे कडल्यान पुलीस उपमहानिरिक्षक म्हूण जी पदां आशिल्लीं त्या पदांचो ताबो काडून घेतला, तशेंच तांणी पुलीस म्हासंचालकांक (डीजीपी) रिपोर्ट करपाचे आदेश जारी केल्यात. तांचे कडेन आशिल्ल्या पदांचो ताबो सध्या दुसऱ्या अधिकाऱ्यां कडेन दिला.
आयपीएस अधिकाऱ्यान कळंगूटेंतल्या एका पबांत एके पर्यटक बायले कडेन गैरवर्तणूक केल्ल्याची बातमी ‘भांगभूंय’त’ छापून आपले उपरांत फक्त 12 वरांच्या भितर डॉ. कोन हांचेर कारवाय केल्या. हे विशींचे पडसाद विधानसभेंत उमटिल्ले. ताचेर घडिल्ल्या प्रकरणाची खात्या खाला चवकशी सुरू आसा. ह्या अधिकाऱ्याचेर खर कारवाय करतले, अशें प्रकार सोंसून घेवचे नात, अशें मुख्यमंत्री डॉ. प्रमोद सावंत हांणी बुधवारा विधानसभेंत सांगिल्लें.
ते उपरांत कांय वरांतूच डीआयजी डॉ. कोन हांचेर कारवाय केल्या. तांचे कडल्या पदांचो ताबो काडून घेतला. तशेंच तांणी डीजीपींक रिपोर्ट करचो, अशें आदेश जारी केल्यात.
मजगतीं, राज्य सरकारान घडिल्ल्या प्रकाराची सगली म्हायती केंद्रीय गृह मंत्रालयाक कळयल्या. ताका लागून कोन हांची गोंयांतल्यान बदली जावपाक शकता. तांचे वयलीं फुडली कारवाय केंद्रीय गृह मंत्रालय करतले. ते अधिकार केंद्राक आशिल्ल्यान सध्या तांकां गोंयांत कसलेंच पद दिनासतना दवरला. तांचे कडल्या पदांचो ताबो सध्या दुसऱ्या अधिकाऱ्यां कडेन दिल्ल्याची म्हायती सुत्रांनी दिली.
डॉ. ए कोन हे अॅग्मू कॅडरच्या 2009 च्या बॅचचे अधिकारी आसात. डिसेंबर 2022 त तांकां डीआयजी रॅकीगेंत बडटी मेळिल्ली. अरूणाचल, दिल्ली हांगा सेवा दिले उपरांत फेब्रुवारी 2023 त तांची गोंयांत बदली जाल्ली.
मजगतीं, कळंगूटे पबांत एका पर्यटक बायले कडेन जाल्लो वाद सीसीटिव्हींत रेकॉर्ड जाला. हाचो व्हिडियो मुख्यमंत्र्यां मेरेन पावले उपरांत खात्या खाला चवकशी सुरू जाली. काल तांकां पदा वयल्यान काडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
