भांगरभूंय | प्रतिनिधी
भांगरभूंय । बातमीदार
हरमल: हरमलच्या पुलीस आवट पोस्टा कडेन वचपी पांय वाट व्हांवून गेली. फाटल्या कांय दिसां सावन सेगीत पडपी पावसा लागून चार मिटर रूंद, देड मिटर खोल आनी धा मिटर लांबांयेचो व्हाळ हांगा निर्माण जाला.
मुखेल रस्त्या वेल्यान हें आवट पोस्ट सुमार शंभर मिटर अंतराचेर आसा. हांगा वचपाक पांय वाट लागता. हे पांय वाटेन आतां व्हाळाचें रूप घेतलां. ताका लागून पुलीस कार्यालयांत वचपाक भंय निर्माण जाला. माती फुसफुशीत जाल्ल्यान हांगा गाडी भितर वचपाची आनी माती व्हांवून वचपाची शक्यताय आसा, अशें नागरीक सुहास प्रभू हांणी सांगलें.
हे पर्यटन सुवातेर पर्यटकांक कायदो सुवेवस्था राखपा खातीर आवट पोस्टाची गरज आशिल्ली. सध्या हो आवट पोस्ट स्थलांतरीत करपाचो विचार चालू आसा. पूण जो मेरेन आवट पोस्ट हे सुवातेर आसा तो मेरेन पांय वाट वेवस्थीत करून दिवपाची गरज सुहास प्रभू हांणी उक्तायली.
मांद्रें मतदारसंघाचे आमदार जित आरोलकार हे विशीं दखल घेवन रोखडींच पावलां उबारचीं अशी मागणी सध्या थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
