भांगरभूंय | प्रतिनिधी
मडगांव: मडगांव सावन कारवारचे दिशेन वचपी म्हामार्गार कुंकळ्ळी-पाजरखणी वाठारांत रस्त्याचे मदीं मोटें झाड पडलें. ह्या झाडा सयत रस्त्याचे कुशीक आशिल्ल्याे वीज सरयो तुटल्यो. हाका लागून सुमार दोन वरां म्हामार्गार येरादारीची कोंयडी जाल्ली. उजो पालोवपी दळान झाड कुशीक काडले उपरांत येरादारी सुरळीत जाली.
मडगांव सावन कारवारचे दिशेन वचपी रस्त्यार पाजरखणी कुंकळ्ळी वाठारांतल्या नुसी हॉस्पिटला मुखा वयल्याल पेत्रोल पंपा कुशीक वादळी वाऱ्याक लागून झाड पडलें. हें झाड विजेच्या सरयां सयत पडलें. ह्या विद्युतभरीत सरयांक लागून झाडाकूय शॉक येवंक शकता, हे खातीर वाहन चालकांक दोनूय वटांनी आडावन दवरले.
घडणुकेची म्हायती मेळटकूच पुलिसां सयत उजो पालोवपी दळाक दिली. तशेंच हाजीर आशिल्ल्यांनी वीज खात्याचे कचेरे कडेन संपर्क सादून वीज सरयांचेर झाड पडिल्ल्याची म्हायती दिली. झाड पडून लेगीत विजेच्यो सरयो तुटूंक नाशिल्ल्यान विद्युत प्रवाह सुरूच आशिल्लो आनी झाडाचे कुशीक स्पार्किंगाचो आवाज येतालो.
सांजवेळचो वेळ आशिल्ल्यान मडगांव-कारवार ह्या रस्त्यार दोनूय वटांनी वाहनांच्या रांगो लागिल्ल्यो. वीज पुरवण खंडीत जाले उपरांत दळाच्या जवानांनी झाड कुशीक काडले उपरांत येरादारी पुलिसांनी येरादारी सुरळीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
