भांगरभूंय | प्रतिनिधी
निशेधा सयत डॉक्युमेंटरीचेर बंदी घालपी खाजगी थाराव संमत
सत्ताधारी आमदारांची बीबीसीचेर टिका
थाराव अयोग्य आशिल्ल्याचो विरोधकांचो दावो
पणजी : गुजरात दंगलीचेर आधारीत बीबीसीन केल्ल्या डॉक्युमेंटरीच्या खासगी थारावाचेर सत्ताधारी आनी विरोधी आमदारां मदीं आरोप प्रत्यारोप जाले. हो विशय न्यायालयांत आशिल्ल्या कारणान थाराव घेवप अयोग्य आसा असो मुद्दो विरोधी आमदारांनी मांडलो. प्रधानमंत्री नरेंद्र मोदी हांची बदनामी करपाचो हेत डॉक्युमेंटरी फाटल्यान आशिल्ल्याचो आरोप सत्ताधारी आमदारांनी केलो.
आमदार कृष्णा साळकार हांचो खाजगी थाराव चर्चे उपरांत संमत जालो. ह्या डॉक्युमेंटरीचेर बंदी घालपा सयत निशेध करपाची मागणी तांणी खासगी थारावाच्या आधारान केली. बंदी घालपाचे मागणी सयत थारावाची प्रत सरकार केंद्रीय गृह मंत्रालयाक धाडून दितलें अशें मुख्यमंत्री डॉ. प्रमोद सावंत हांणी सांगलें.
प्रधानमंत्री नरेंद्र मोदी हे 2002 वर्सा गुजरातचे मुख्यमंत्री आशिल्ले. 27 फेब्रुवारी 2002 ह्या वर्सा गोध्रा वचपी रेल्वेच्या डब्याक उजो लायलो. हातूंत खूबशा लोकांक लासून मरण आयलें. हाचे उपरांत गुजरातांत दंगल जाली. ह्या दंगलीचेर आधारीत वीस वर्सां उपरांत बीबीसीन डॉक्युमेंटरी केल्या. ह्या डॉक्युमेंटरीचेर सरकारान बंदी घाल्या. घडणुकेक 20 वर्सा जाले उपरांत डॉक्युमेंटरी कित्याक? देश तशेंच प्रधानमंत्र्यांक बदनाम करपाचें हें कारस्थान आसा अशें आमदार कृष्णा साळकार हांणी थाराव मांडटना म्हणलें. विरेश बोरकार, कार्लोस फरेरा, वेंझी व्हिएगश, क्रुज सिल्वा, विजय सरदेसाय, एल्टन डिकॉस्टा, युरी आलेमांव हांणी थारावाच्या विरोधांत उलोवपां केलीं. आमदार उल्हास तुयेंकार, राजेश फळदेसाय, संकल्प आमोणकार, केदार नायक, प्रेमेंद्र शेट, रुडॉल्फ फर्नांडीस, दिगंबर कामत, डॉ. चंद्रकांत शेट्ये हांची थारावाचे समर्थन करपी उलोवपां जालीं.
बीबीसी ही विश्वासार्ह माध्यम संस्था आसा. डॉक्युमेंटरीचेर बंदी आसा. तशेंच डॉक्युमेंटरीक बंदी घालपाक न्यायालयांत आव्हान दिलां. हो विशय न्यायप्रविश्ट आशिल्ल्यान थाराव मांडप अयोग्य आसा अशें विरोधी पक्ष फुडारी युरी आलेमांव हांणी सांगलें. ही डॉक्युमेंटरी जानेवारींत तयार जाल्ली. बंदी लागू जावचे पयलीं हांवें ती पळयिल्ली. बंदी आदेशाक न्ययालयांत आव्हान दिलां. ह्या थारावाक लागून गोंयकार आतां ही डॉक्युमेंटरी पळयतले. आयज माध्यम स्वातंत्र्य आसा. लोकशायेंत माध्यम स्वातंत्र्य आसप गरजेचें आसा. गुजरात दंगलीचेर अभ्यास करून बीबीसीन डॉक्युमेंटरी तयार केल्या अशें विजय सरदेसाय हांणी सांगलें.
मणिपुरात जो हिंसाचार जाता, ताचेर चर्चा करपाची केंद्रांतल्या भाजप सरकाराची तयारी ना. गुजरात दंगलीचेर आधारीत डॉक्युमेंटरीचेर मात चर्चा जाता अशें क्रुज सिल्वा हांणी सांगलें.
प्रधानमंंत्री नरेंद्र मोदी हे देशाचे प्रधानमंत्री आसात. मोदी प्रधानमंत्री जाले उपरांत देशांत एक वेगळेंच वारें व्हांवपाक लागलां. संवसारांत लेगीत मोदींक लागून देशाचो सन्मान जाता. बीबीसीची डॉक्युमेंटरी हो प्रधानमंत्री नरेंद्र मोदी हांची बदनामी करपाचो यत्न आसा, अशें आमदार दिगंबर कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
