पर्रा देवळांत फंडपेटी फोडून 70 हजार रुपया फारायले
भांगरभूंय | प्रतिनिधी
म्हापशें : पर्राच्या लिंगाभाटांतल्यान श्रीनागनाथ महादेव देवस्थानांत फंडपेटी फोडून पयशे चोरले. हे फंडपेटयेंत सुमार 70 हजार रुपया आसतले, असो अदमास देवस्थान समितीन उक्तायलां.
हे विशीं चड म्हायती प्रमाण, ह्या देवळाच्या फाटले वटेन आशिल्ल्या जनेलाक लोखणाचें ग्रील आसा. हें ग्रील कापून चोर देवळांत भितर सरले आनी तांणी फंडपेटी फोडली. फंडपेटयेंत आशिल्ले सगळे पयशे चोरांनी चोरले. हे चोरयेंत तीग चोरांचो आसपाव आसा. हें सगळें देवळांत आशिल्ल्या सिसीटीव्ही कॅमेर्यांत आयलां.
चोर दिसल्यात, पूण रेनकोट आनी तोंडाचेर मास्क घाल्ल्यान तांची वळख पटूंक ना.
ही घडणूक शुक्रारा सकाळीं उक्ताडार आयली. म्हापशें पुलिसांक हे विशीं कळटांच तांणी घडणुके सुवातेर येवन पंचनामो केलो.
आमदार मायकल लोबो हांणी हांगा येवन पळोवणी केली आनी रातच्या वेळार पुलीस गस्त वाडोवपाची गरज उक्तायली. गस्त घालपा खातीर पुलिसांक मोटार सायकली दिल्ल्यो. पूण सध्या गस्त बंद जाल्या. गस्त वाडल्यार असल्यो घडणुको वाडच्यो नात. आपूण विधानसभेंत हो प्रस्न मांडटलों अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
