भांगरभूंय | प्रतिनिधी
म्हापशें: गोंय सरकारान फाटल्या सुमार चार वर्सांत कोटपा कायद्या खाला 89 हजार 681 गुन्यांव नोंद केल्यात आनी ते प्रमाण 1 कोटी 35 लाख रुपयांचो दंड वसूल केला.
आमदार डॉ. चंद्रकांत शेट्ये हांणी विचारिल्ल्या प्रस्नाचेर भलायकी मंत्र्यान विधानसभेंत लेखी स्वरुपांतली जाप दिली.
तंबाकूजन्य पदार्थ विकप्यांक कोटपा कायद्या खाला तशेंच भौशीक सुवातेर धुम्रपान आनी थुकपा आडचे कारवाये खाला ही दंडात्मक कारवाय केल्या. जानेवारी 2019 त मे 2023 ह्या 53 म्हयन्यांच्या काळांत हे गुन्यांव नोंद केल्यात.
हातूंतले 51709 गुन्यांव कोटपा खाला जाल्यार भौशीक सुवातेर धुम्रपान आनी थुकपाच्या प्रकरणांत 37972 जाणांचेर कारवाय केल्या. कोटपा खाला 86.60 लाख जाल्यार धुम्रपान आनी थुकिल्ल्या प्रकरणांत 48.41 लाख रुपया दंड मेळून 1 कोटी 35 लाख 1200 रुपया दंडात्मक रक्कम वसूल केल्या.
2019 वर्सा 24018, 2020 वर्सा 16233, 2021 वर्सा 15053, 2022 वर्सा 21563 आनी मे 2023 मेरेन 2814 गुन्यांव नोंद केल्यात.
मजगतीं, गोंय दांत म्हाविद्यालय आनी भलायकी सेवा संचालनालय आनी मनरिजवण संस्थे वतीन दर वर्सा 31 मे दिसा संवसारीक तंबाकू विरोधी दीस मनयतात. ह्या वेळार तंबाकूच्या दुश्परिणामा विशीं जागृताय निर्माण करपा खातीर तंबाकू विरोधी चित्रपट महोत्सव आयोजीत करतात. हे खातीर सरकार दांत म्हाविद्यालयाक 3 लाख रुपयांचो निधी दिता अशी म्हायतीय मंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
