भांगरभूंय | प्रतिनिधी
न्हंयांक हुंवार; दोन दिसांत सात घरांचें लुकसाण
दिवचल: म्हालांत बुधवारा रातभर तशेंच बिरेस्तारा दिसभर उटंगाराचो पावस पडिल्ल्यान खूबशा सुवातांनी पडझड जाली. दिवचल, अस्नोडें, सांखळी हांगासरल्या न्हयांचे पातळेंत मोटी वाड जाली. आपत्कालीन यंत्रणेक सतर्क केल्यात. सांखळी व्हाळवाट न्हंये वेले पंपींग सुरू केलां. दिवचलचे न्हंयचेरूय गरज पडल्यार पंपींग सुरू करतले. दिवचल म्हालांत विवीध सुवातांनी फाटल्या 28 वरांत सुमार सात घरांचेर झाडां पडून सुमार देड लाखांचे लुकसाण जाल्ल्याचो मुळावो अदमास आसा.
न्हंयो, व्हाळ धोक्याची पातळे कुशीक पाविल्ल्यान उदका स्रोत खातें, आपत्कालीन यंत्रणा सतर्क दवरल्या. हरवळें घसघसो व्हड प्रमाणांत व्हांवत आसा. पावसांतूय लोकांची गर्दी दिसून येता.
नवरवाडो पाळी हांगासरल्या कृष्णा घाडी हांच्या घराचेर मोटें झाड पडून पाख्याचें लुकसाण जालें. हातूंत सुमार 75 हजारांचें लुकसाण जाल्ल्याचो मुळावो अदमास आसा. कुडचिरें, सांखळे, कुडणें बी वाठारांनी घरांचें लुकसाण जालां. ताचो अहवाल एकठांय करपाचें काम सुरू आसा. मयें, दिवचल आनी सांखळी मतदारसंघांत जाल्ल्या पडझडी विशीं उजो पालोवपी दळ सुसेग घेनासतना मजत कार्य करता.
मुख्यमंत्री डॉ. प्रमोद सावंत हांणी दिवचल म्हाला बरोबरूच राज्यांतल्या लुकसाणीचो नियाळ घेतला आनी सगली ती मजत दिवपाचे आदेश दिल्यात. जांचें लुकसाण जालां तांचो अहवाल ताकतिकेन सादर करून जिल्होधिकाऱ्या कडेन दिवचो असोय आदेश दिला. पावसाचो नेट वाडलो जाल्यार हुंवाराचो धोको न्हयकारूं येनाशिल्ल्यान यंत्रणा सतर्क जाल्या.
दिवचल म्हालांत बिरेस्तारा 50 मिमि पावसाची नोंद जाल्ली आसून वट्ट पावस 1650 मिमि जाल्ल्याची म्हायती गोपांनी दिली.
गांवकारवाड्यार पिंपळ पडलो
गांवकारवाडो दिवचले श्रीशांतादुर्गा देवळाचे फाटले वटेन आशिल्ल्या पेडांत शेंकड्यांनी वर्सां पोरणो आशिल्लो पिंपळ काल (बिरेस्तारा) रातीं पडलो. सुदैवान कसलेंच लुकसाण जावंक ना. पिंपळ पडलो तेन्ना दीसपट्टी थंय दुचाकी आनी चारचाकी वाहनां पार्क केल्लीं आसतात. पूण काल रातीं एकूय वाहन थंय पार्क करूंक नाशिल्लें. पिंपळ पडलो तेन्ना वाठारांत कोणूच नाशिल्लो. सद्दां थंय कोणूय वाहनां पार्क करून गजाली करीत आसतात. पूण पावस पडत आशिल्ल्यान थंय कोणूच नाशिल्लो. देवस्थान समितीचे अध्यक्ष नगरसेवक सतीश गांवकार आनी हेर पदाधिकारी घडणूक थळार दाखल जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
