भांगरभूंय | प्रतिनिधी
पणजी : स्मार्ट सिटीचें आतां मेरेन 33 टक्के काम पुराय जालां. स्मार्ट सिटीच्या आदल्या मुखेल कार्यकारी अधिकार्यान ह्या कामा कडेन आडनदर केल्या. हे विशीं दक्षता खात्यांत कागाळ दाखल केल्या. ताचेर निश्चीतपणान खर कारवाय जातली, अशें मुख्यमंत्री डॉ. प्रमोद सावंत हांणी सांगलें.
आमदार आल्टोन डिकॉस्टा हांणी प्रस्न काळांत स्मार्ट सिटी विशीं प्रस्न मांडलो तेन्ना जाप दितना मुख्यमंत्री उलयताले.
हे विशीं मुख्यमंत्र्यान म्हणलें, स्मार्ट सिटीचें काम 2016 पसून चालू आसा. तें ऑक्टोबर 2023 मेरेन पुराय जातलें. सध्या स एजन्सी काम पळयतात. हो प्रकल्प पुराय जालो काय ह्या एजन्सीं कडल्यान युटिलायझेशन प्रमाणपत्र आमी घेतले. सगळे जाण वायट कामा विशींच उलयतात. बरींय कामा खूब जाल्यांत. तांचे विशींय उलोवचें अशें म्हणीत ग्यान सेतू आनी योग सेतूचो मुख्यमंत्र्यान ह्या वेळार उल्लेख केलो.
आमदार आल्टोन डिकॉस्टा हांणी स्मार्ट सीटी कामांत व्हड घोटाळो जाल्ल्याचो आरोप केला. आमदार युरी आलेमांव हांणी, स्मार्ट सिटीचीं कामां करपी खात्यां मदीं समन्वय ना, अशें सांगलें. तशेंच हीं कामां करतना मातयेचें परिक्षण करूंक ना. कामांत व्हड घोटाळो जाला. ताका लागून खोलायेन चवकशी जावप गरजेचें अशें तांणी म्हणलें.
स्मार्ट सिटीच्या कामाची न्यायालयीन चवकशी करची. हें काम म्हणल्यार एक व्हडली भानगड आशिल्ल्याचें आमदार विजय सरदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
