इर्शाळवाडी गांवाचेर दोंगर कोसळलो

भांगरभूंय | प्रतिनिधी

75 जाण सुरक्षीत, 5 जणांक मरण

भांगरभूंय । खबरां संस्था

रायगड : कोकणांत पावसाचो बरोच फटको बसल. व्हड पावसाक लागून रायगडांतल्या खालापूर तालुक्यातल्या इर्शाळवाडी गांवाचेर बुधवारा रातीं दोंगराचो एक व्हडलो भाग कोसळून पुराय गांव ताच्या पोंदा पुरलो. ही घडणूक बुधवारां रातीं 11 वरांचेर घडली. चौक गांवांतल्यान 6 किमी अंतराचेर मोरबे धरणाच्या वयल्या भागांत आदिवासी वस्ती आसा. हे वस्तीचेर हें संकश्ट कोसळ्ळें. गांवांत 40 घरां आसात. हीं सगळीं घरां मातये सकयल आयल्यात. रातच्या वेळार गांवांतले लोक न्हिदिल्ले आसतना ही दरड कोसळ्ळी. हे घडणुकीतल्यान 75 जणांक सुरक्षीत भायर काडलें. 60 ते 70 लोक अजून माती, खडपां पोंदां आसात, असो अदमास आसा. आतां मेरेन 5 जणांक मरण आयले. आवाज येतकच भोंवतणच्या गांवांतल्या लोकांनी धांवपळ करून मजत कार्याक सुरवात केली. उजो पालोवपी दळ आनी पुलिसांक आपयले. एनडीआरएफचो पंगडय थंय पावलो.

बचावकार्यात आडखळ
हे घडणुकेची म्हायती मेळटकच एनडीआरएफचे दोन विभाग घडणुक सुवातेर धावले. मातये पोंदा उरिल्ल्या लोकांक सोडवपा खातीर बचाव कार्य सुरू आसा. पूण पावस, धुकें आनी चिखलाक लागून व्हड आडखळ निर्माण जाता. गांव चड भितर आशिल्ल्यान घडणुक सुवातेर दोन वरां चलत वच्चे पडटा. मजगतीं, हे घडणुकेची म्हायती मेळ्ळ्या उपरांत मंत्री उदय सामंत, दादा भुसे, गिरीश महाजन मध्यान रातीं सुवातेर पावले.

मुख्यमंत्री एकनाथ शिंदे घडणुक सुवातेर
ब्रेस्तारा सकाळीं मुख्यमंत्री एकनाथ शिंदे थंय पावले. ताणें हे घडणुकेचो पुराय नियाळ घेतलो. रस्तो नाशिल्ल्यान बचावकार्यात आडखळ येत आशिल्ल्यान हेलिकॉप्टरांतल्यान बचावकार्याचे काम सुरू करपाची सुचोवणी तांणी यंत्रणेक दिली.

पुलीस नियंत्रण केंद्राची बांदणी
सोद घेवपाक आयिल्ल्या सोयऱ्यांक आनी लोकांक कळोवपा खातीर पुलीस नियंत्रण केंद्र रोखडोच स्थापन केलो, जाका लागून सोडवणूक कामांत कसलोच त्रास जावचो न्हय आनी लोकांची म्हयती रोखडीच मेळची. एपीआय हरेश काळसेकार ह्या नियंत्रण कक्षांतल्यान सेवा दिता.

उजो पालोवपी जवानाक मरण
नवी मुंबयचो उजो पालोवपी दळाचो जवान शिवराम यशवंत डूमरे हांकां बचाव कार्याक वतना काळजाचो आताक येवन मरण आयलें. थंय पावपाक रस्तो नाशिल्ल्यान बचाव कार्या खातीर गेल्ल्या कर्मचाऱ्यांक सगळें सामान घेवन चलत वच्चें पडलें. हाका लागून ह्या जवानाक आताक आयलो.