भांगरभूंय | प्रतिनिधी
खबरां संस्था
तुळजापूर : तुळजाभवानी देवळांतले भांगर- रुप्याचे अळंकार, देवीच्यो पादुका, माणिक आनी मोतयां, वेगवेगळ्या राजा- महाराजांनी देवीक अर्पण केल्लीं 71 मोलादीक आनी दुर्मिळ नाणीं अजूनय गायब आशिल्ल्याचें उक्ताडार आयलां. तीन वांगड्यांचे समितीन ह्या प्रकरणांत तीन अधिकाऱ्यां सयत पांच जाणांचेर आरोपपत्र दाखल केल्लें. पूण, तीन वांगड्याचे समितीन दोशी थारायिल्ल्या पांच जाणांतल्यान चार जाणांक क्लीन चिट दिवन फकत एका मनशाचेर कायदेशीर कारवाय केल्ली. भांगर- रुप्याचे अळंकार मेजतना परत एक फावट तुळजाभवानी देवळाच्या दुर्मिळ मोलादीक अलंकारांचो काळो बाजार उक्ताडार आयला. हे विशींची खबर एका नामनेच्या दिसाळ्यान दिल्या.
2001 ते 2005 त कितें घडलें?
2001 ते 2005 ह्या काळांत तुळजाभवानी देवीच्या देवळांत मोलादीक भांगर आनी रुप्याचे अळंकारांक पांय फुटले. तेन्नाचे धर्मीक वेवस्थापक राजाभाऊ दीक्षित हांच्या मरणा उपरांत तांच्या घरांतल्यान चावी घेवन देवीचो जामदारखानो तेन्नाच्या अधिकाऱ्यांनी कायदेशीर प्रक्रिया करिनासतना आपल्या हातांत घेतलो. पुजारी मंडळाचे आदले अध्यक्ष किशोर गंगणे हांणी ह्या प्रकरणांत कागाळ दाखल केल्ली. तुळजाभवानी देवूळ समितीचे अध्यक्ष आनी तेन्नाचे कलेक्टर राधाकृष्ण गमे हांणी तीन वांगड्यांची समिती नेमली. हे समितीन त्या काळांतल्या सगळ्या अधिकाऱ्यांची पुराय चवकशी करून सविस्तर अहवाल कलेक्टराक सादर केलो. ह्या अहवालांत प्रशिक्षणार्थी तहसीलदार सी. व्ही. सूर्यवंशी, प्रशिक्षणार्थी नायब तहसीलदार आर. एस. माने, तुळजापूर तहसीलदार सतीश राऊत, देवूळ समितीचे सहाय्यक धर्मीक वेवस्थापक दिलीप नायकवाडी आनी महंत चिलोजी बुवा हांकां अटक केल्ली. तांचे आड कायदेशीर कारवाय करची अशीय सुचोवणी तीन वांगड्यांची समितीन केल्ली.
कर्मचाऱ्यांचोच वस्तींचे घालो?
सध्याचे कलेक्टर डॉ. सचिन ओम्बासे हांणी तुळजाभवानी देवीच्या देवळांत भक्तांनी दिल्लें भांगर- रुपें वितळोवपाचें थारायलां. हाचे पयलीं भांगर वितळ्ळ्या उपरांत 55 किलो तूट आयिल्ल्याची लेखी नोंद आसा. फाटल्या 13 वर्सांत भक्तांनी 204 किलो भांगर आनी 861 किलो रुपें अर्पण केलां. तें वितळावचे पयलीं देवूळ समितीचे अध्यक्ष आनी कलेक्टर डॉ. सचिन ओम्बास हांणी भांगर- रुपें मेजपा खातीर एक समिती तयार केल्ली. तिणें फाटल्या दोन म्हयन्यांत देवळाचे पुर्विल्ले अळंकार, भक्तांनी अर्पण केल्ले अळंकार आनी तुळजाभवानी देवीचे महंतांच्या ताब्यांत आशिल्ले आदले अळंकार मेजल्यात. हे खेपे देवळाचें वेवस्थापन करपी कर्मचाऱ्यांनी देवीच्या तिजोरेचेर हात साफ केला असो तपास करप्यांक दुबाव आसा.
भांगर -रुपें मेजपी समितीन आपलो अहवाल कलेक्टर आनी देवळ समितीचो अध्यक्ष ओम्बासे हांचे कडेन सादर केल्लो. पूण, निमाणो अहवाल चड वस्तुनिश्ठ पद्दतीन सादर करचो अशें सुचोवन तांणी तो स्विकारूंक ना. देवीच्या अळंकारांच्या सात पेटयेंतल्यान दोन क्रमांकाचे पेटयेंतले मोलादीक शिवकालीन अळंकार गायब आसात असो उल्लेख समितीन अहवालांत केला. आतां समिती परत एक फावट वस्तुनिश्ठ अहवाल सादर करतली, तातूंत हीं रत्नां केन्ना बेपत्ता जालीं, तांकां कोण जापसालदार आशिल्लो हाचे विशीं जायत्या प्रस्नांक जाप दितली.
गायब जाल्लीं 71 दुर्मिळ नाणीं
देवीक नाणी दिवपी राजा, राजवटी, संस्थानां आनी नाण्यांची संख्या मुखार दिल्ले प्रमाण- बीकानेर (4), औरंगजेब (1), डॉलर (6), चित्रकूट उदयपुर इन्स्टिट्यूट (3), ज्युलियन (1), शाह आलम इजरा (4), बीबाशुरूक (1), फुलदार (1), दारुल खलीफा (1), फतेह हैदराबाद औरंगजेब आलमगीर (1), दोन आणे (2), इंदौर राज्य सूर्य छाप (1), अकोट (2), फारूकाबाद (1), लखनऊ (1), पुर्तुगेज (9), इस्मायल शाह (1), बडोदा (2), रसुलिल्ला अकबर आनी शाहजहान (4), ज्युलस हैदराबाद (5), अनद नाणे (20)
पेटयेची चावी ना
2018 वर्सा सहाय्यक धर्म वेवस्थापक पदभार दितना सीलबंद पितळेच्या पेटीची चावी अधिकाऱ्यान शेणयली. देखून कुलूप फोडचें पडलें. त्या पंचनाम्यांत दोन जड लोखणाच्यो पेटयो आशिल्ल्यो, तांकां कुलूप नाशिल्ले. राजा- महाराजांनी दिल्लीं मोलादीक रत्नां उक्त्या जाग्यार मेळ्ळीं. ते खातीर तीन वांगड्यांची समितीन तेन्नाच्या अधिकाऱ्यांचेर निश्काळजीपणाची म्होर मारिल्ली.
उक्ते सुवातेर मेळिल्ल्यो वस्ती
भितर रुप्याच्या अक्षराची दोरी आशिल्लो भांगराचो मुकूट, दोरयेचो रुप्याचो मुकूट, भांगराच्यो सरयो आनी बारीक भांगराचो पिठो आशिल्ली ल्हानशी पेटी, रुप्याच्यो पादुका, एक आरती नग, भितर लोखणाची दोरी आशिल्लो भांगराचो चाबुक, मातयेचो पिठो आशिल्ली ल्हान पेटी, बारीक भांगराचो पिठो, मोती आनी रुप्याची ल्हान पेटी. हें सगळें उक्त्यार मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
