भांगरभूंय | प्रतिनिधी
मडगांव: अंबाजी फातोड्ड्यां काल (बुधवारा) सकाळीं पावसा सयत आयिल्ल्या वादळी वाऱ्याक लागून झाड हुमटून पडलें. हें झाड रस्त्यार आशिल्ल्या मोटारीचेर आनी दुचाकीचेर पडिल्ल्यान सुमार दोन लाखांचें लुकसाण जालां. उजो पालोवपी दळाच्या जवानांनी झाड कुशीक काडून रस्तो येरादारी खातीर मेकळो केलो.
मेळिल्ले म्हायती प्रमाण बुधवारा सकाळीं आठ वरांच्या सुमाराक झाड रस्त्यार पडिल्ल्याचो फोन मडगांवच्या उजो पालोवपी दळाक आयलो. घडणूक थळार पावले उपरांत हें झाड रस्त्यार पडिल्लें आसून ताचे पोंदा टाटा इंडिका मोटार आनी ज्युपीटर ही दुचाकी सांपडिल्ल्याचें दिसून आयलें. दळाच्या जवानांनी खांदे कापून दोनूय गाडयो कुशीक काडल्यो. उपरांत झाड मारून दोन वरां भितर रस्तो येरादारी खातीर मेकळो केलो.
हे दुर्घटणेंत दोनूय गाडयांचे सुमार दोन लाखांचें लुकसाण जालां. जाल्यार सुमार 20 हजारांची मालमत्ता वाटावपाक दळाक येस आयलें. तशेंच सोनसड्यार कोयर यार्डा कुशीच्या रस्त्यार झाड पडपाची घडणूक काल सांजवेळा पांच वरांच्या सुमाराक घडली. जाल्यार फातोड्डें पुलीस स्टेशना कुशीच्या रस्त्यार झाड पडपाची घडणूक घडली. फांतोडेर साडेचार वरांचेर राष्ट्रीय म्हामार्गा वयल्या मेटास्ट्रीप कंपनी मुखार रस्त्याचे कुशीक झाड पडून येरादारीक आडखळ निर्माण जाली.
दळाच्या जवानांनी झाड कुशीक काडून येरादारी सुरळीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
