भांगरभूंय | प्रतिनिधी
म्हापशें: बार्देस म्हाला सयत म्हापशें शारांत सेगीत पडत आशिल्ल्या पावसाक लागून लोकजीण विस्कळीत जाली. म्हापशें, पर्वरी आनी पिळर्ण उजो पालोवपी दळांक 30 परस चड झाडां पडल्यांत अशे फोन आयले. हीं चडशीं झाडां हुमटून वीज सरयांचेर आनी रस्त्यार पडलीं. बागा वाठारांत नाझरी रिसॉर्टाचे पार्कींग सुवातेंत वाहनांचेर झाड पडून 50 हजारांचें लुकसाण जालें.
बागा कळंगूटे नाझरी रिसॉर्टाचे पार्कींग सुवातेंतलें एक झाड हुमटून मोटार, दुचाकी, लायटीचो खांबो आनी दुकानाचेर पडलें. हातूंत हुंडाय मोटार जीए 03 डब्ल्यू 7752 आनी पल्सर दुचाकी जीए 03 एस 9342 ह्या वाहनांचे सुमार 50 हजारांचें लुकसाण जालें. पिळर्ण उजो पालोवपी दळाच्या जवानांनी हें झाड कापून कुशीक काडलें.
तशेंच पीर्ण, शिवोली, गिरी, पोंबुर्फें, कालवी, कोलवाळ, थिवी, खोर्ली करासवाडो, नास्नोळें, बस्तोडें, पेडें, हणजूणें, कामुर्ली, आकय, माडेल, सुकूर, बिठ्ठोण, पर्वरी उद्यान, आल्त पर्वरी ह्या वाठारांनी झाडां रस्त्यांचेर, विजेच्या सरयांचेर हुमटून पडलीं. हीं झाडां उजो पालोवपी दळाचे अधिकारी श्रीकृष्ण पर्रीकार आनी दामोदर पेडणेंकार हांच्या फुडारपणा खाला दळाच्या जवानांनी कापून कुशीक काडलीं.
जाल्यार वीज कर्मचाऱ्यांनी वीज वाहिन्यो जोडून वीज पुरवण सुरळीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
