भांगरभूंय | प्रतिनिधी
प्रकाश वेळीप: परवानगी नासतना सभाघरांत फलक कशे व्हेले?
मडगांव: गोंय विधानसभेंत विरोधकांनी कला अकादमीच्या प्रस्ना वयल्यान फक्त मंत्री गोविंद गावडेक दोशी धरप हें चुकीचें आसा. चवकशी उपरांत सत्य भायर येतलें. तशेंच विधानसभेंत सुरक्षा आसून लेगीत अध्यक्षांचे परवानगे बगर आक्षेपार्ह फलक कशे व्हेले. हो सुरक्षिततायेचो प्रस्न आशिल्ल्यान ह्या प्रकरणाची चवकशी जावची अशी मागणी उटाचे अध्यक्ष आनी आदले आमदार प्रकाश वेळीप हांणी केली.
उटा संघटणे वतीन मडगांवां पत्रकार परिशद घेवन भोवजन समाजाचे फुडारी म्हूण मंत्री गोविंद गावडे हांचेर टिका करीत आशिल्ल्याचें तांणी सांगलें. ह्या गजालींचो निशेधूय तांणी केलो. ह्या वेळार प्रकाश वेळीप हांचे सयत उटा संघटणेचे दुर्गादास गावडे, विश्वास गावडे, अनील गांवकार बी हाजीर आशिल्ले.
मुखार उलयतना वेळीप हांणी म्हणलें, कला अकादमीच्या पोरण्या इमारतीचो कांय भाग दोन दिसां पयलीं कोसळ्ळो. विधानसभेंत ताचेर बोवाळ चल्ला. दुर्घटणा ही केन्नाय घडूंक शकता, ती सांगून येना. ताका लागून खात्याचे मंत्री तशेंच कला अकादमीचे अध्यक्ष गोविंद गावडे हांकां दोशी धरप चुकीचें आसा. फोंडेंची शेतकी खात्याची इमारत कोसळ्ळी. हे घडणुकेची चवकशी जाले उपरांत दोशी आशिल्ल्यांचेर कारवाय करतले अशें मुख्यमंत्र्यांनी सांगलां. अशें आसून लेगीत मंत्री गावडे हांकां दोशी थारावपाच्या गजालीचो उटा वतीन निशेध करतात अशें प्रकाश वेळीप हांणी म्हणलें.
विधानसभेंत विरोधकांनी सभाघरांत जें साहित्य, फलक दाखयले ते व्हरपा खातीर विधानसभा अध्यक्षांनी परवानगी दिल्ली, हेंवूय तपासप गरजेचें आसा. अशे तरेन विधानसभे सारक्या सभाघरांत खंयचीय वस्तू व्हरतना परवानगी घेवपाची गरज आसना? असोय प्रस्न आसा. ताका लागून विधानसभा अध्यक्षांनी ह्या प्रकाराची चवकशी करतनाच सुरक्षा रक्षकां कडल्यान हलगर्जीपणा जालो काय कितें हाचीय चवकशी जावची अशी मागणी तांणी केली.
रेल्वे अपघाताक आमदार, रेल्वे मंत्र्याक दोशी धरप हें योग्य नासता. जाची चूक आसा तांकां धरल्यात. गोंयांत ज्यो पोरण्यो इमारती आसात, त्या सगल्या बांदकामांचे स्ट्रक्चरल ऑडीट जावपाची गरज आसा. तशेंच आयजूच (काल) गांज्या नवे 10 कोटींचें पंपहावस पडलें. तें पडले उपरांत एखाद्या मंत्र्याचो, आमदाराचो राजिनामो मागप योग्य न्हय. सैमीक आपत्तीक लागून आनी गोंयांत पडपी उटंगाराच्या पावसाक लागून ह्यो घडणुको घडत आसतात. ताका वैयक्तीक रितीन एखाद्याक जापसालदार धरप योग्य न्हय. घडिल्ल्या गजालींचेर लक्ष दिवपाची जापसालदारकी अभियंतो, आमदार आनी मंत्र्यांची आसता. पूण अशे तरेन भोवजन समाजांतलें नेतृत्व आशिल्ल्यान ताचेर टिका करप चुकीचें आसा अशें प्रकाश वेळीप हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
