दाबोळे विमानतळा विशी आमदारांक हुस्को

भांगरभूंय | प्रतिनिधी

दाबोळी विमानतळ कसोच बंद जावचो ना. आमी केंद्राक पत्रूय बरयलां. गरज पडल्यार शिश्टमंडळ व्हरतले. – मुख्यमंत्री प्रमोद सावंत

दाबोळे दोन वर्सां पयलीं ३३४ विमानां येतालीं, आतां १५४ येतात – आमदार संकल्प आमोणकार

पणजी : एअर इंडियाची विमानसेवा दाबोळी सोडून मोपाच्यान सुरू जाल्ल्यान दाबोळे विमानतळ बंद जावपाचो हुस्को विरोधकां सयत सत्ताधारी आमदारांनी उक्तायलो. सध्या जीं विमानां दाबोळे विमानतळाचेर येतात तीं मोपाचेर वच्चीं नात, हाची जतनाय सरकार घेतलें, अशें मुख्यमंत्री डाॅ. सावंत हांणी सांगलें. आलेक्स रेजिनाल्ड हांचे लक्षवेधी सुचोवणेचेर बरोच वेळ चर्चा जावन ‘दाबोळे विमानतळ बंद जावचो ना’, अशी हमी मुख्यमंत्री डॉ. प्रमोद सावंत हांणी दिली.
दाबोळे विमानतळा खातीर सर्वपक्षी शिश्टमंडळ दिल्ली व्हरपाची सरकाराची तयारी आसा, अशें मुख्यमंत्र्यान सांगलें.
एअर इंडिया कंपनीन 21 जुलय सावन दाबोळे सोडून मोपाच्यान विमानसेवा दिवपाचो निर्णय घेतला. दाबोळे येवपी विमानाचो आंकडो उणो जायत आसा जाल्यार मोपावेल्या विमानांचो आंकडो वाडटा. दाबोळे विमानतळ बंद जावपाचो हुस्को आमदार रेजिनाल्ड हांणी लक्षवेधी सुचोवणी सादर करतना उक्तायलो.
ताचेर बरोच वेळ चर्चा जाली. विरोधी आमदारां सयत सत्ताधारी आमदारांनीय दाबोळी वाटोवपा खातीर आराखडो तयार करपाची गरज उक्तायली.
गोंयांक दोन विमानतळांची गरज आसा. मोपा विमानतळा उपरांत दाबोळे विमानतळ उरतलोच अशी हमी केंद्रीय हवाई मंत्रालयान दिल्या. गोंय सरकारान दाबोळे विमानतळ उरचो, म्हूण केंद्रीय हवाई मंत्री तशेंच केंद्रीय पर्यटन मंत्र्यांक पत्र बरयलां. गरज पडल्यार सर्व पक्षीय शिश्टमंडळ व्हरून दाबोळे विमानतळ उरचो अशी मागणी करपाची सरकाराची तयारी आसा.
गोंय हे संवसारीक पर्यटन थळ आसा. विमान प्रवाशांचो आंकडो दिसान दीस वाडतूच आसा. हाका लागून दाबोळी विमानतळ उरतलोच, अशें मुख्यमंत्री डॉ. प्रमोद सावंत हांणी सांगलें.
विमान प्रवाशांचो आंकडो वाडतूच आसा. हाका लागून दाबोळी विमानतळा विशीं ‘भिवपाची गरज ना’, अशें आस्वासन मंत्री मॉवीन गुदिन्हो हांणी दिलें.
आमदार दिगंबर कामत, आलेक्स सिक्वेरा, वेंझी व्हिएगस, एल्टन डिकोस्टा, संकल्प आमोणकार, कृष्णा साळकार, कार्लोस फेरेरा, विजय सरदेसाय, युरी आलेमाव हांचींय ह्या वेळार उलोवपां जालीं.
दक्षीण गोंयची हॉटेलांच न्हय जाल्यार टॅक्सी वेवसाय, दुकानां आनी हेर वेवसाय दाबोळे विमानतळाचेर निंबून आसात. दाबोळे विमानतळ उरपा खातीर सरकारान आराखडो तयार करपाची मागणी आमदारांनी केली. दोन वर्सां पयलीं दाबोळी विमानतळाचेर वर्साक 334 विमानां येतालीं, आतां हो आंकडो 154 चेर पावला, अशें भाजपाचे आमदार संकल्प आमोणकार हांणी सांगलें.