पावसाक उशीर जालो, तरी उदकाचो उणाव जाणवचो ना
भांगरभूंय | प्रतिनिधी
आपत्कालीन आराखडो तयार : सुभाष शिरोडकार
पणजी : फुडाराक उदकाचो उणाव जावचो न्हय देखून सरकाराची आपत्कालीन येवजण तयार आसा, अशें उदका पुरवण मंत्री सुभाष शिरोडकार हांणी सांगलें.
सप्टेंबरा उपरांत उदकाची पातळी देंवतली. मागीर धरणांतल्यान जें उदक झिरपता तें परत धरणांत सोडपाची वेवस्था आसतली. तशेंच न्हंयांचें उदक सांठोवन ताची पुरवण जातली. कुशावती न्हंयचें उदक केप्यां सांठोवन ताची मडगांव, वेर्णे वाठारांत पुरवण करपाची येवजण आसा, अशें मंत्री शिरोडकार हांणी सांगलें.
बाणावलेचे आमदार वेंझी व्हिएगस हांच्या प्रस्नाचेर उदका विशीं भासाभास जाली. अंदूं पावसाक उसरां सुरवात जाली. धरणांतलें उदक उणें जाल्ल्यान भिरांत निर्माण जाल्ली. अंजुणें धरणांतलें उदक आटिल्ल्यान तिळारीचें उदक आमठाणें सावन पडोशें प्रकल्पांत व्हरपाची तजवीज आशिल्ली. इतल्यान पावस आयलो म्हूण तिळारीचें उदक पडोशें प्रकल्पांत व्हरपाची गरज पडली ना. फुडल्या वर्सा पावस उसरां आयलो जाल्यार उदकाचो उणाव जावची न्हय देखून तशी वेवस्था केल्या. तिळारी धरणांत भरपूर उदक आसा. तिळारीचें उदक कळंगूटे, शिवोले, बागा वाठारांत दिवपाची येवजण आसा. सविस्तर आराखडो सादर करपाची तयारी केल्या, अशें मंत्री शिरोडकार हांणी फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
