पावसाचो सत्तरी म्हालाक फटको
भांगरभूंय | प्रतिनिधी
मामलेदार कचेरेची राखणे वणत, अर्जुन गांवकाराचें घर कोसळ्ळें
वाळपय : सेगीत पावस पडिल्ल्यान राज्यांत सगळे कडेन झाडां पडप, घरां कोसळप, रस्ते उदका पोंदा वचप अशे प्रकार घडतूच आसात. उटंगाराच्या पावसाचो फटको सत्तरी म्हालाक बरोच नेटान लागला. आयज सकाळीं वाळपय मामलेदार कार्यालयाचे इमारती भोंवतणी आशिल्ली राखणे वणत कोसळ्ळी. वाहनाचें लुकसाणूय जालें. ही घडणूक सकाळीं 7 वरांचेर घडली.
मजगतीं, सकाळीं सालेलीच्या अर्जुन चंदू गांवकार हांच्या घराचो अर्दो भाग कोसळिल्ल्यान ह्या कुटुंबाक बरेंच लुकसाण जालें. कोणाक कांय जावंक ना.
वाळपय मामलेदार कचेरे भोंवतणी आशिल्ली राखणे वणत कोसळून लागींच आशिल्ल्या उजो पालोवपी दळाच्या वाहनाचें लुकसाण जालें. वाळपय बांदकाम खात्यान हो वाठार रोखडोच नितळ करून वाहन भायर काडलें. दुसरी वणत रोखडेच उबारतले, अशें बांदकाम अधिकार्यांनी स्पश्ट केलें. हे विशींचो प्रस्ताव बेगीनूच तयार करून तो मान्यताये खातीर धाडटले, अशेंय तांणी सांगलें.
अर्जून गांवकार हांच्या मातयेच्या घराचो अर्दो भाग कोसळ्ळो. सामानाचें व्हडा प्रमाणांत लुकसाण जालां. ह्या कुटुंबाची अर्थीक परिस्थिती सामकी वायट आसा. नवें घर बांदप शक्य नाशिल्ल्यान तीं ह्या मातयेच्या घरांत रावतालीं. बारीक सारीक कामां करून अर्जुन हे आपलो संवसार चलयतात. सरकारान तशेंच ह्या वाठाराची आमदार डॉ. देविया राणे हांणी लक्ष घालून अर्जुन हांकां मजत करपाची मागणी नागरिकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
