भांगरभूंय | प्रतिनिधी
भांगरभूंय । प्रतिनिधी
पर्वरी : गोंय विधानसभेंत आयज सकाळी प्रस्न काळांत आमदार विजय सरदेसाय हांणी म्हादयचो प्रस्न विचारतकच सभाघरांत बरोच बोवाळ जालो. उदका वाद लवादान दिल्ल्या निवाड्याक राज्य सरकारान स्थगिती मागची, असो मुद्दो ह्या वेळार आमदार सरदेसाय हांणी मांडलो.
हाचेर उदकास्रोत मंत्री सुभाष शिरोडकार हांणी कर्नाटका कडेन जरी 28 खासदार आसले तरी म्हादय प्रस्नाचेर राज्य सरकार केन्नाच तडजोड करचें ना आनी हें अधिवेशन सोंपले उपरांत सभाघर समितीची बसका घेतले, अशी गवाय तांणी दिली.
म्हादय प्रस्नाचेर विरोधी पक्ष फुडारी युरी आलेमाव, आमदार कार्लुस फेरेरा हांणीय सरकाराक धारेर धरपाचो यत्न केलो. मंत्री शिरोडकार आनी मुख्यमंत्री डॉ. प्रमोद सावंत हांणी ह्या प्रस्नाचेर जापो दिल्यो.
कर्नाटकाक केंद्रा सरकारान कळसा भांडुरा प्रकल्पा खातीर कसलेच तरेचे परवाने दिवचे न्हय हे खातीर गोंय सरकार यत्न करता. कर्नाटकाक ह्या प्रकल्पा खातीर गोंयच्या रानां खात्या कडल्यान ‘ना हरकत’ दाखलो घेवचो पडटलो. पूण मुखेल वनपाल हो दाखलो दिवचे नात, अशें मुख्यमंत्र्यान सांगलें. आतां मेरेन म्हादय विशीं खुबशे खटले दाखल जाल्यात. ताचेर सर्वोच्च न्यायालय एकठांय सुनावणी घेतलें, अशी म्हायतीय तांणी दिली.
कर्नाटकान सादर केल्ल्या कळसा- भांडुरा प्रकल्पांच्या सविस्तर प्रकल्प अहवालाक (डीपीआर) केंद्रीय जल आयोगान मान्यताय दिल्या. हो डीपीआर आयोगान फाटीं घेवचो. हे खातीर गोंय सरकार कितें करता? असो प्रस्न विरोधी आमदारांनी विचारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
