भांगरभूंय | प्रतिनिधी
परवानो नासतना सुरू आशिल्ले पार्लर बंद करपाचो पुलिसांचो आदेश
म्हापशें: कळंगूटे थळाव्या लोकांनी मसाज पार्लराचेर आवाज काडले उपरांत कळंगूट पुलिसांनी कळंगूट आनी कांदोळे हांगासरल्या पांच पार्लरांचेर धाड घाली. परवानाे नासतना सुरू आशिल्ले पार्लर बंद करपाचो आदेश पुलिसांनी संबंदीत धनयांक दिला.
सोमारा नायकावाडो हांगासरल्या कांय थळाव्यांनी कळंगूट पंचायत कचेरेंत वचून सरपंच जोजफ सिक्वेरा हांचे कडेन वाड्या वयल्या मसाज पार्लराचेर कारवाय करपाची मागणी केल्ली.
हे फाटभुंयेर बिरेस्तारा पुलीस उपअधिक्षक विश्वेश कर्पे आनी निरिक्षक परेश नायक हांच्या फुडारपणा खाला पुलीस पंगडान कळंगूट आनी कांदोळेंतल्या मसाज पार्लरांचेर धाड घालून पडटाळणी केली. ह्या वेळार दोनूय पंचायतींचे कर्मचारी हाजीर आशिल्ले.
हातूंत लिलायन एक्सोटीक सेंटर – टिटोस लेन, एसओआय थाय – स्नोव पार्क कुशीक बुध्दा स्पा – भारत जंक्शन, दे फ्लोरा – भारत जंक्शन आनी आयुर्वेदीक मसाज ट्रीटमेंट सेंटर – कांदोळे ह्या पार्लरांचो आस्पाव आशिल्लो.
ह्या वेळार दे फ्लोरा स्पाच्या चालकाक गरजेचीं कागदपत्रां सादर करप शक्य जालें ना. स्पा सुरू करपा विशीं गरजेचे परवपाने मेळोवपाची प्रक्रिया सुरू आशिल्ल्याचें ह्या चालकान सांगलें. ताका लागून परवानो नासतना चलत आशिल्लो हो स्पा रोखड्या रोखडो बंद करचो असो निर्देश पुलिसांनी संबंदिताक दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
