भांगरभूंय | प्रतिनिधी
थळाव्यांची कारवाय करपाची मागणी; हल्लो करप्यां मदीं दोगां चलयांचो आस्पाव
वाळपय: वाळपय-ठाणें रस्त्यार हनुमान विद्यालया कुशीक चिंबलाचो एक तरणाटो आनी दोन तरणाट्यो हांचे कडल्यान कोपाड्डेंच्या तरणाट्यांचेर हल्लो करपाचो यत्न केले उपरांत वाळपय पुलीस स्टेशनार रातीं उसरां मेरेन कोपाड्डें वाठारांतले नागरीक आनी हेर वाठारांतल्या ग्रामस्थांनी गर्दी केली, आनी तांचेर कारवाय करपाची नेटाची मागणी केली. रातीं उसरां मेरेन हे विशींची चवकशी सुरू आशिल्ली.
चिंबलाचो एक तरणाटो आनी ताचे बरोबर आयिल्ल्यो वाळपयच्यो दोन तरणाट्यो आपल्या मोटारींतल्यान ठाणें वाठारांतल्या वाळपयचे दिशेन वताल्यो. कोपाड्डेंचो तरणाटो प्रितेश सावंत आपल्या घरा वतालो. चार चाकी वाहनान ताचे दुचाकीक धपको दिल्ल्यान दोगांय मदीं बाचाबाची जाली. ह्या वेळार थंय पाविल्ले श्रीपाद सावंत हांणी प्रकरण मिटोवपाचो यत्न केलो. पूण त्या तरणाट्यांनी श्रीपाद सावंत आनी प्रितेश सावंत हांचेर चाकवान हल्लो करून जखमी करपाचो यत्न केलो.
हे विशींची म्हायती मेळटकूच कोपाड्डें आनी हेर गांवांतल्या ग्रामस्थांनी व्हड संख्येन पुलीस स्टेशनार गर्दी करून तांचेर कारवाय करपाची मागणी केली.
रातीं उसरां मेरेन पुलीस स्टेशनार गर्दी आशिल्ली. मजगतीं हल्लो केल्ल्यांक पुलिसांनी सरकारी समाजीक हॉस्पिटलांत दाखल करून तांची वैजकी तपासणी केली. तेच प्रमाण श्रीपाद सावंत आनी प्रितेश सावंत हांकांय वैजकी तपासणी खातीर हॉस्पिटलांत दाखल केल्यात. रातीं उसरां मेरेन तपास सुरू आशिल्लो.
मेळिल्ले म्हायती प्रमाण जो तरणाटो आनी दोगां तरणाट्यांनी हल्लो केलो ते सोरो पियेल्ले असो दुबाव थळाव्यांनी उक्तायलो. हाका लागून व्हड प्रमाणांत वेव्हार जायत आशिल्ल्याचें मुखार आयलां. हे खातीर वाळपय पुलिसां मुखार एक प्रकारचे आव्हान निर्माण जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
