भांगरभूंय | प्रतिनिधी
फोंडें: फर्मागुडयेर लायटीच्यो सरयो पडून चार गोरवांक मरण आयलें. गोरवां चरतना ही घडणूक घडली. हीं चारूय गोरवां नितीन प्रभू गांवकार हांचे मालकेचीं. तांकां सुमार 50 हजार रुपयांचें लुकसाण जालां. हे घडणुकेची म्हायती मेळटांत वीज कर्मचार्यांनी येवन विजेच्या सरयांची दुरुस्ती केली.
मंगळारा सकाळीं 11.30 वरांचेर अभियांत्रिकी म्हाविद्यालयाच्या कॅम्पसांत हीं गोरवां चरतालीं. मजगतीं 33 केव्ही लायटीच्यो सरयो तुटून पडिल्ल्यो. ह्या सरयांक तेंकिल्ल्यान ह्या चारूय गोरवांक विजेचो शाॅक लागून मरण आयलें. हे घडणुके उपरांत व्हड बोवाळ जाल्ल्यान लागींच्या लोकांनी वीज खात्याक हे विशीं म्हायती दिली. वीज अभियंते आनी कर्मचारी, तशेंच फोंडा पुलीस घडणुके सुवातेर आयले.
हे सुवातेक कोणूच व्यक्ती नाशिल्ल्यान व्हड दुर्घटना टळ्ळी. तरीय निश्पाप गोरवांचो बळी गेलोच. नितीन प्रभू गांवकार हांणी ह्या वाठारांत जमनी पोंदच्यान वीजेच्यो सरयो घालपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
