शिरशिरें- बोरयेंच्या घसघश्याचेर पर्यटकांची गर्दी
भांगरभूंय | प्रतिनिधी
फोंडें : शिरशिरें- बोरयेंच्या घसघश्याचेर पर्यटकांची गर्दी वाडतूच आसा. राज्य सरकारान घसघश्यांचेर वचपी पर्यटकांचेर बंदी घाल्या. तरीय हांगा कांय तरणाटे सोर्याचे नशेंत धुंद जावन मस्तेपणां करतना दिसतात. पुलिसांनी ह्या वाठारांत गस्त घालून घसघश्याचेर वचपी तरणाट्यांचेर कारवाय करची अशी मागणी ह्या वाठारांतल्या लोकांनी केल्या.
कांय दिसां पयलीं सरकारान घसघश्यांचेर वचपाक बंदी घाल्ल्याची घोशणां केल्या. पूण शिरशिरेंच्या घसघश्याचेर फाटल्या कांय दिसां सावन गर्दी दिसून येता. कांय तरणाटे सोर्याच्यो रिकामी बाटल्यो तश्योच उडोवन वतात. व्हडा प्रमाणांत कोयर काडून उदकांत उडयतात.
कांय वर्सां पयलीं ह्या वाठारांत खडी काडपाचें काम सुरू आशिल्लें. कांय कारणांक लागून तें बंद पडिल्ल्यान दोंगरांतल्यान उदक ह्या वाठारांत व्हांवून येता. उदक खुबूच उंचाये वेल्यान व्हांविल्ल्यान ते पळोवपाक लोक येतात. खास करून मोगांत पडिल्लीं जोडपीं दिसून येतात. पर्यटक रस्त्याचेर वाहनां दवरून सुमार 200 मिटर अंतराचेर आशिल्ल्या ह्या घसघश्याचेर चलत येतात. सोर्याचे नशेंत हांगा कसलीय घडणूक घडपाचो भंय थळाव्यांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
