भांगरभूंय | प्रतिनिधी
वास्को ः गुदांवांतलें सामान फोडपाच्या आनी वीज केबल चोरपाच्या प्रकरणांत वास्को पुलिसांनी चवगांक अटक केली. चोरयेचो माल जप्त केला. गुदांवांचे शटर बागोवन कांय गुन्यांवकारांनी गुदांवांतल्यान वीज केबल चोरल्यात, अशी कागाळ वास्कोचे संजय नागवेकार हांणी केल्ली, अशें पुलीस निरीक्षक कपिल नायक हांणी सांगलें.
ताचो भाव इलेक्ट्रीक दुकान चलयता आनी ताचे सगळे सामान तो एका गुदांवांत दवरता. सीसीटीव्ही फुटेज प्रमाण, ही चोरी 15 जुलयाक मध्यानरातीं 2.10 वरांचेर जाली. बारीकसाणीन चवकशी केले उपरांत गुन्यांवकारांक ताब्यांत घेवपाक आमकां येस मेळ्ळें. चोरी करपाक वापरिल्ल्या गाडये वांगडाच चोरी केल्लो पुराय माल जप्त केला. गुदांवांचो मालक गोंया भायर आसा.
ह्या प्रकरणांत वास्कोचे खाजा गोलर (30), असलम साब शेख (37), यल्लप्पा हजरानु (39) आनी जफर खान (39) हांका चवगांक अटक केल्या. आमी चोरी केल्ली 80,000 रुपया मोलाचे 1400 मीटर वेगवेगळ्या आकाराचे वीज केबल जप्त केल्यांत अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
