भांगरभूंय | प्रतिनिधी
पणजी: राज्य शिक्षण खात्या वतीन दिवपी राज्य शिक्षक पुरस्काराचें नांव बदलून आतां ‘मुख्यमंत्री- वशिष्ठ गुरु पुरस्कार 2022-23’ अशें नांव दवरलां. शिक्षकांनी ते 10 ऑगस्ट मेरेन भरून सादर करपाक जाय.
दर वर्सा राज्य शिक्षक पुरस्कारा खातीर शिक्षकांनी स्वता अर्ज करचे आसतात. 10 शिक्षकांची निवड जाता. ह्या पुरस्कारांचे अर्ज म्हालांतल्या एडीईआय कार्यालयांनी उपलब्ध आसात. शिक्षकांनी हे अर्ज भरून पणजी, म्हापशें वा मडगांवच्या शिक्षण केंद्रांनी सादर करचे, अशें शिक्षण खात्यान कळयलां.
अंदूं ह्या पुरस्काराचें नांव बदलिल्ल्यान हाचे फुडें ‘मुख्यमंत्री- वशिष्ठ गुरु पुरस्कार’ ह्या नांवान राज्य शिक्षक पुरस्कार भेटयतले. वशिष्ठ गुरु हे अयोध्येचे राजगुरु आशिल्ले. राजा दशरथ हांचे सयत श्रीरामांचेय ते गुरू. सप्त ऋषीं मदीं वशिष्ठांक व्हड स्थान आसा. ताका लागून गोंय सरकारान शिक्षक पुरस्काराक तांचें नांव दिवपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
