दिवचल पालिकेक पांच कोटीं वयर येणें
भांगरभूंय | प्रतिनिधी
भाडें मुजती भितर भरलें ना जाल्यार कडक कारवाय
दिवचल: दिवचल नगरपालिका वाठारांतलीं विवीध कार्यालयां, घरपट्टी तशेंच गाळेधारकांचें आनी सरकारी आस्थापनांचें भाडें मेळून आतां मेरेन सुमार पांच कोटी रुपयांची वसुली थकिल्ली आसा. हे विशीं मुख्याधिकारी सचीन देसाय हांणी खर भुमिका घेतना खुबश्या जाणांक नोटीस धाडल्या.
दिवचल पालिका विभागांत आदले- नवें मार्केट, बाजार संकूल, टावन सेंटर इमारत मेळून सुमार 330 कार्यालयां, दुकानां, गाडे आसात. कांय सुवातांचेर परवाने रद्द जाल्यात. थोड्यांचें भाडें थकलां. ताका लागून अर्थीक गणीत सांबाळटना पालिकेक कसरत करची पडटा. खुबशीं सरकारी कार्यालयां पालिकेच्या संकुलांत आशिल्ल्यान तांचेंय भाडें कोटीच्या लागीं आसा. ताका लागून आतां पालिकेन संबंधितांक पत्र तशेंच नोटीस धाडपाक सुरवात केल्या. दिल्ल्या वेळार भाडें भरपाक उशीर केल्यार कडक कारवाय करपाचो निर्णय पालिकेन घेतला.
मुख्याधिकारी देसाय हांणी सांगलें : आमी हे विशीं संबंदीतांक नोटीस धाडपाक सुरवात केल्या. कांय बाबतींक तांत्रीक आनी कायदेशीर आडखळी आसात. तशेंच सरकारी कार्यालया विशीं संबंदितांक स्मरण पत्रांय धाडल्यांत. सरकार फाटपुरवण करता. जांची थकबाकी आसा तांणी ती बेगीन पालिकेंत जमा करची.
दिवचल पालिकेक वर्सुकी सुमार णव कोटींचें उत्पन्न निश्चीत केलां. वर्सुकी अदमास पत्रकांत तशें नियोजन निश्चीत केलें. हाचे खाला घरपट्टी एक कोटी, बांधकाम परवाने एक कोटी णव्वद लाख, विवीध कार्यालयां आनी गाळे भाडें एक कोटी चाळीस लाख, सोपो कर पंचेचाळीस लाख, कोयरांतल्यान पंचायशीं लाख आनी हेर माध्यमांतल्यान उत्पन्न येता. पूण थकबाकी आजूनय तशीच आशिल्ल्यान पालिका मंडळ आनी अधिकारी हांणी विशेश मोहीम सुरू केल्ल्याची म्हायती नगराध्यक्ष कुंदन फळारी हांणी दिली. दिवचल पालिकेक साडेतीन कोटींचें सरकारी अनुदान मंजूर जालां. तांतूंल्यान खुबशे उदरगतीचे प्रकल्प सुरू केल्यात.
उद्देगीक वसणुकेची थकबाकी बरीच आशिल्ल्यान ते विशींय पत्रवेव्हार केला, अशें सचीन देसाय हांणी सांगलें. देवीज आशिल्लें भाडें वेळार फारीक केलें ना जाल्यार खुबशे गाडे, कार्यालयांक सील मारपाची तयारी पालिकेन दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
