भांगरभूंय | प्रतिनिधी
भांगरभूंय । प्रतिनिधी
वास्को: कोयर संकलन केंद्रांतल्या कोयराच्या डब्यांनी तशेंच खंयच्याय वाठारांत कोयर उडोवप्यां आड कारवाय करतले अशे तक्टे कांय सुवातांचेर लायल्यात. हाडून उडयल्ल्या कोयरांतल्यान कितेंय खावपाक मेळत म्हणून जनावरां तो कोयर उस्तितात आनी उपरांत तो रस्त्यांचेर सगळ्याक पातळटा. ताका लागून ह्या जनावरांचेर कारवाय जातली काय? असो प्रस्न तक्टे पळोवन लोक विचारतात.
दारांनी कोयर एकठांय करपाक येवपी कामगारां कडेन कोयर दिवचे सोडून तो रस्त्या कुशीक, तशेंच कोयर संकलन केंद्राच्या वाठारांत उडोवपाचे प्रकार घडटात. ताका लागून सगळे कडेन कोयर दिसपाक लागला.
मेळटा थंय कोयर उडोवप बंद करपा खातीर वास्कोचे आमदार दाजी साळकार हांणी फुडाकार घेतला. तांणी प्रायोगीक तत्वाचेर मांगोरहील हांगच्या बीएसएनएल केंद्रा लागसारच्या कोयर संकलन केंद्राची निवड केल्या. हांगा कोयर उडोवचो न्हय देखून लोकां मदीं जागृताय करतले. तांच्यो समस्या आयकून घेतले अशें तांणी म्हणलें.
लोकांनी मेळटा थंय कोयर उडोवचो न्हय देखून शिटकावणी दिवपी तक्टे सगळ्याक लायल्यात. तांचो नागरिकांचेर कितलो परिणाम जाला हें येवपी कांय दिसांनी कळटलें.
‘कोयर उडोवचो न्हय’ हें सांगपी तखटे लायल्या. पूण हेडग्या जनावरांचें कितें असो प्रस्न सध्या फुडें सरला. मजगतीं हेडग्या गोरवांक धरून तांकां गोशाळेंत धाडिल्लीं. ताका लागून वाहनचालक, नागरिकांनी समाधान उक्तायल्लें. पूण कांय दिसां सावन अचकीत हेडगी गोरवां सगळे कडेन दिसूंक लागिल्ल्यान ताचेर उपाय करपाची मागणी नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
