भांगरभूंय | प्रतिनिधी
भांगरभूंय । प्रतिनिधी
पणजी: उक्तावणाची वाट पळोवपी कला अकादमीच्या ओपन थेटराचो एक भाग काल रातीं कोसळ्ळो. रातच्या वेळार ही दुर्घटना जाल्ल्यान कोणाक दुखापत जावंक ना. उटंगाराच्या पावसाक लागून तो कोसळ्ळा.
कला अकादमीचे अध्यक्ष तशेंच कला आनी संस्कृती मंत्री गोवींद गावडे हांणी, कोसळिल्लो भाग कला अकादमी इमारतीचो भाग न्हय. तो 43 वर्सां आदींचो भाग आशिल्ल्याचें तांणी सांगलें. तशेंच हे संबंदी पीडब्ल्यूडी कडल्यान अहवाल मागला अशें सांगून मागीर हे विशीं विस्तारान उलयतलों अशें तांणी म्हणलें.
आमदार विजय सरदेसाय हांणी हे विशीं उलयतना म्हणलें, उक्तावणा पयलींच कला अकादमीचो एक भाग कोसळ्ळो. हांवें हाचे आड आवाज काडलो म्हूण म्हजेर सगल्यांनीच खर टिका केल्ली. बांदकामांतल्या गैरप्रकाराक लागून हें घडटलां. आतां मंत्री राजिनामो दितले व्हय, असो प्रस्न करून तांणी ह्या मुद्याचेर विधानसभेंत चर्चा जातली, अशें सांगलें.
कला अकादमीच्या इमारतीचो कांय भाग कित्याक कोसळ्ळो हाची चवकशी करपाचे निर्देश अभियंत्यांक दिल्यात. हे संबंदी तांचे कडल्यान अहवाल मेळ्ळे उपरांत श्वेतपत्रिका जारी करतले अशें बांदकाम मंत्री निलेश काब्राल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
