सत्तरी म्हालांत वट्ट 101 मुळाव्यो शाळा
भांगरभूंय | प्रतिनिधी
बर्या सुविधांक लागून पालक खाजगी शाळांचे दिशेन
भांगरभूंय । प्रतिनिधी
वाळपय: फाटल्या वर्साचे तुळेंत सत्तरी म्हालांतल्या सरकारी मुळाव्या शाळांची स्थिती अजून बरी आसा. सगळ्यो इमारती बरे स्थितींत आसात. ताका लागून जिल्लो शिक्षण अधिकार्यान अंदूं विद्यार्थ्यांचो आंकडो वाडोवपाची शक्यताय उक्तायल्या. पूण गांवगिर्या वाठारांनी चलपी सरकारी शाळांक फुडाराक जायत्यो आडखळी निर्माण जावपाची शक्यताय आसा. हाचें कारण गांवगिर्या शाळांनी विवीध सुविधा दिसनात. शारांतल्या शाळां प्रमाण हांगाय त्यो उपलब्ध जावच्यो अशी मागणी पालक करतात.
ह्या म्हालांत मुळाव्या पांवड्यावेल्या सरकारी शाळांचो आंकडो 101 इतलो आसा. तशेंच खाजगी शाळांचोय हांगा आंकडो व्हडा प्रमाणांत आसा. मुक्ती उपरांत सत्तरी म्हालांतल्या दरेका गांवांनी शाळा उबारल्यो. उपरांत तेन्नाचे मुख्यमंत्री प्रतापसिंह राणे हांणी शिक्षण आनी रस्ते हाचेर भर दिवन शाळांक बरो सुविधा दिवपाचेर भर दिलो. शिक्षीत पिळगी निर्माण जावपा खातीर सरकारी मुळाव्यो शाळा म्हत्वाच्यो घटक थारल्यो.
शाळांच्यो इमारती सुरक्षीत
मेळिल्ले म्हायती प्रमाण, सगळ्या शाळांच्यो इमारती सुरक्षीत आसात. सावड्डें पंचायत वाठारांतल्या बंदीलवाड्यार आशिल्ले सरकारी इमारतीचें पांखें दुरुस्त करपाची गरज आसा. हे विशींचो प्रस्ताव बांदकाम खात्याक सादर केला. हांगाचे दुरुस्तीचें काम रोखडेंच पुराय जातलें अशें भाग शिक्षण अधिकार्यान म्हणलां. फाटल्या पांच वर्सां सावन खुबश्यो इमारती सारक्यो केल्यात. उरिल्ल्यांचें काम फुडल्या वर्सा जातलें, अशें भाग शिक्षण अधिकार्यान सांगलां.
गांवगिर्या वाठारांतल्या शाळांक आनी सुविधायो दियात
शारांतल्या शाळां प्रमाण गांवगिर्या वाठारांतल्या शाळांक बर्यो सुविधायो उपलब्ध करून दियात. शारांनी खुशब्यो सुविधायो उपलब्ध आसात पूण गांवगिर्या वाठारांतल्या शाळांनी त्यो ना. ताका लागून पालक आकर्शीत जावन आपल्या भुरग्यांक खाजगी शाळांनी घालतात. ताका लागून गांवगिर्या वाठारांतल्या शाळांनी विद्यार्थ्यांचो आंकडो उणो जाता, अशें आपली प्रतिक्रिया उक्तायतना हिवरेंच्या रामकृष्ण गांवस हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
